राज्यसभेच्या एका जागेसाठी ४ ऑक्टोबरला निवडणूक

नवी दिल्ली : महाराष्ट्रातून राज्यसभेवर रिक्त असलेल्या एका जागेसाठी ४ ऑक्टोबर २०२१ रोजी निवडणूक होणार असून, २२ सप्टेंबर अर्ज करण्याची अंतिम तारिख आहे. भारत निवडणूक आयोगाने गुरुवारी (ता. ९) महाराष्ट्रासह, पश्‍चिम बंगाल, आसाम, मध्य प्रदेश आणि तमिळनाडूमधून राज्यसभेवर रिक्त झालेल्या एकूण सहा जागांसाठी निवडणूक कार्यक्रम जाहीर केला. खासदार राजीव सातव यांच्या निधनामुळे १६ मे २०२१ पासून महाराष्ट्रातून राज्यसभेची जागा रिक्त झाली आहे. या जागेसह राज्यसभेच्या एकूण सहा जागांसाठी ४ ऑक्टोबर २०२१ ला निवडणूक घेण्यात येणार असून, याच दिवशी निकाल जाहीर होणार आहे. या निवडणुकीसाठी १५ सप्टेंबरला अधिसूचना जारी होईल. २२ रोजी अर्ज करण्याची अंतिम तारिख असून, २३ रोजी अर्जांची छाननी होणार आहे. २७ सप्टेंबरपर्यंत अर्ज मागे घेता येणार आहे. ४ ऑक्टोबरला सकाळी ९ ते दुपारी ४ वाजेपर्यंत मदतदान होणार असून, सायंकाळी ५ वाजता मतमोजणी होऊन निकाल जाहीर होणार आहे.