विमा कंपन्यांविरोधात किसान सभेचा तीन ऑगस्टपासून एल्गार

औरंगाबाद : पंतप्रधान पीकविमा योजनेतील सदोष तरतुदी आणि अंमलबजावणीमुळे दुष्काळग्रस्त शेतकऱ्यांना वंचित ठेवून हजारो कोटी रुपयांचा नफा विमा कंपन्या कमावीत आहेत. याविरोधात किसान सभेतर्फे क्रांतिसिंह नाना पाटील यांची जयंती ३ ऑगस्टपासून पुण्यात विभागीय आयुक्त कार्यालयासमोर बेमुदत आंदोलन करण्याचा इशारा महाराष्ट्र राज्य किसान सभेने दिला आहे. याविषयीची माहिती किसान सभेचे सरचिटणीस नामदेव गावडे यांनी बुधवारी (ता. १७) पत्रकार परिषदेत दिली. 

पंतप्रधान पीकविमा योजनेत धोरणात्मक बदल करून दुष्काळग्रस्त शेतकऱ्यांना पीकविमा नुकसान भरपाई वाटप करण्यात यावे, यासाठी किसान सभेतर्फे राज्यव्यापी आंदोलन उभे केले आहे. वर्ष २०१७ -१८ मध्ये परभणी जिल्ह्यात १०७ शेतकऱ्यांनी आत्महत्या केल्या. त्याच वेळी विमा कंपनीचा नफा १०७ कोटी रुपयांचा आहे. मराठवाड्यात २०१८-१९ मध्ये  १२३७ पेक्षा जास्त शेतकऱ्यांच्या आत्महत्या झाल्या. तर २०१८-१९ मधील विमा कंपन्यांचा नफा १२३७ कोटी रुपये आहे. 

एकूणच विमा कंपन्या शेतकऱ्यांना अक्षरश: लुटत असताना, शासकीय स्तरावर विमा कंपन्यांना अभय दिले जात आहे. पुणे येथे होणाऱ्या आंदोलनात विदर्भ, मराठवाडा, खानदेश व पश्‍चिम महाराष्ट्रातील शेतकरी सहभागी होणार असल्याचेही त्यांनी स्पष्ट केले. या वेळी जिल्हाध्यक्ष कॉ. अशोक जाधव, सचिव कैलास कांबळे, दौलतराव जाधव, संजय आव्हाड, महादू काकुळते, शंकर राऊतराय यांची उपस्थिती होती.

अशा आहेत मागण्या