पांढरकवडा येथील शेतमाल विक्रीतून गावातील युवकांनाही रोजगार

यवतमाळ : इच्छा तिथे मार्ग असतोच, हे सिध्द करीत खैरगाव देशमुख (ता. पांढरकवडा) येथील शेतकऱ्यांनी नाशवंत असलेल्या कलींगड विक्रीसाठी अभिनव पॅटर्न राबविला आहे. त्याव्दारे शेतकऱ्यांच्या मालविक्री सोबतच गावात छोटे मालवाहू वाहनधारक युवकांच्या रोजगाराचा प्रश्‍न सुटण्यास मदत झाली आहे. 

तेलंगणाच्या सीमेवर असलेला पांढरकवडा तालुक्‍यातील खैरगाव देशमुख हा दुर्गम भाग. नागपूरसारख्या मोठ्या बाजारपेठेत माल पाठविण्यासाठी येथील शेतकऱ्यांना तासनतास लागतात. त्यामुळे स्थानिक स्तरावरच शेतमालाची विक्री केली जाते. सिंचनाच्या सोयी असल्याने नगदी पिके घेण्याकडे या भागातील शेतकऱ्यांचा कल आहे. खैरगावमध्ये दरवर्षी कलिंगडाची लागवड होते. व्यापारी थेट सात ते आठ रुपये किलोने कलिंगड घेतात. 

यंदा तब्बल ७० एकरांवर शेतकऱ्यांनी कलिंगडाची लागवड केली. फळे परिपक्‍व झाल्यानंतर विक्रीवेळी मात्र लॉकडाऊनचे कारण देत व्यापाऱ्यांनी अवघ्या दोन ते तीन रुपये किलोने कलींगडाची मागणी केली. उत्पादकता खर्चही यातून निघणे शक्‍य नसल्याने शेतकऱ्यांनी व्यापाऱ्यास माल देण्यास नकार दिला. त्यांनतर शेतकऱ्यांना गावातीलच वाहतूकदारांच्या माध्यमातून पर्याय सापडला.

गावात भाजीपाला व किराणा वाहतूकीसाठी सात ते आठ छोटे मालवाहू वाहने आहेत. त्यांच्यासमोर थेट कलिंगड विक्रीचा पर्याय मांडण्यात आला. वाहनधारकांनीच कलिंगडाची विक्री करावी. सहा रुपये किलोने त्यांना शेतकरी फळे देतील. त्यांनी ती दहा रुपये किलोने विकावी. विक्री झाल्यावर सायंकळी चार रुपये वाहनधारकाला, तर सहा रुपये शेतकऱ्याला दयावे, असे ठरले.  गावोगावी मिळतोय ग्राहकांचा प्रतिसाद 

सध्या एका वाहनाधारकांकडून सरासरी १७ क्‍विंटलची विक्री गावोगावी होत आहे. पांढरकवडा तहसीलदार तसेच पांढरकवडा तालुका कृषी अधिकारी गोपाळ शेरखाने यांनी या विक्री व्यवस्थेचा पर्याय उपलब्ध करुन देण्यासाठी शेतकऱ्यांना सहकार्य केले. त्यामुळेच हा पॅटर्न यशस्वी होऊ शकला, अशी माहिती शेतकरी प्रकाश पुप्पलवार यांनी दिली.