माणमध्ये छावण्या बंद, तरी जनावरे जागेवरच

दहिवडी, जि. सातारा : चारा छावण्या सुरू ठेवण्याची मुदत ३० सप्टेंबर रोजी संपली आहे. मात्र, माणमध्ये अजून २५ चारा छावण्या सुरूच आहेत. यातील काही चारा छावण्याचालकांच्या करामती समोर येऊ लागल्या आहेत. काही ठिकाणी छावणीचालकांनी गेल्या महिन्यापासून पेंड दिली नाही. ऊसही निम्माच देऊन नुसत्याच सह्या घेतल्याने पशुपालकांनी छावण्या बंद होऊनही छावणीवरून जनावरे हालवली नाहीत. ‘ऊस अन्‌ पेंड द्या मग आम्ही जातो,'' अशी मागणी पशुपालक करत आहेत. त्यामुळे संबंधित छावणीचालकांची बिले कापून प्रशासन कारवाई करणार, की त्यांना पाठीशी घालणार? याकडे पशुपालकांच्या नजरा लागल्या आहेत. 

पुढे मुदतवाढ मिळाली नसल्याने छावण्या सुरू राहण्याच्या आशा मावळल्या आहेत. मात्र, असे असले तरी पुरेसा चारा उपलब्ध झाला नसल्याचे कारण देत तब्बल २५ चारा छावण्या अजून सुरू आहेत. चारा छावण्यांमध्ये मोठ्या जनावरास १८ किलो व लहान जनावरास नऊ किलो ओला चारा व प्रती जनावर दररोज अर्धा किलो पेंड देण्याचा शासन निर्णय होता. मात्र, काही छावणीचालकांनी सुरवातीपासूनच चारा कुट्टी करून १८ ऐवजी १५ किलोच दिली. तर काही छावणीचालकांनी मागील काही दिवसांत विविध कारणे देत निम्माच चारा दिला. काही ठिकाणी पेंड दिलीच नाही. मात्र, पशुपालकांकडून चारावाटप रजिस्टरला चारा व पेंड मिळाल्याच्या सह्या घेतल्या आणि चारा नंतर देऊ, असे सांगून वेळ मारून नेली.

 बहुतांशी चारा छावण्या बंद झाल्याने पशुपालकांनी सह्या घेतलेला चारा मिळावा, अशी मागणी केली आहे. संबंधित पशुपालकांनी प्रशासनाकडे वस्तुस्थिती सांगितल्यानंतर तलाठी येऊन गेले. मात्र, त्यांनीही छावणीचालकांची पाठराखण करून पशुपालकांच्या तक्रारीकडे डोळेझाक केली. काही छावणीचालकांनी पशुपालकांना तुम्हाला चारा देण्यात येईल; पण खरी माहिती प्रशासनास सांगू नका. अन्यथा, छावण्या बंद होतील, असे सांगितले आहे.

या आश्वासनामुळे पशुपालकांनीही सह्या केलेला हक्काचा चारा मिळाल्याशिवाय चारा छावणीतून न हलण्याचा निर्णय घेतला आहे. प्रशासन याची गंभीर दखल घेऊन पशुपालकांना न्याय देणार का? चारा छावणीचालकांवर कारवाई करणार का? याकडे सर्वांचे लक्ष लागले आहे.