मराठवाडा, खानदेशातील अठरा कारखान्यांचा गाळप हंगाम उरकला

औरंगाबाद : मराठवाड्यासह खानदेशातील पाच जिल्ह्यांतील १८ साखर कारखान्यांचा गाळप हंगाम उरकल्यात जमा आहे. गतवर्षीच्या तुलनेत यंदा साखरेचे गाळप व साखरेचे उत्पादन निम्म्यापेक्षाही कमी झाल्याचे चित्र आहे. गतवर्षी जवळपास ८८ लाख मेट्रिक टन उसाचे गाळप झाले होते. तर, जवळपास २१ कारखान्यांनी ऊस गाळपात सहभाग नोंदविला होता. 

औरंगाबाद येथील साखर सहसंचालक कार्यालयांतर्गत औरंगाबाद, जालना, बीड, जळगाव, नंदुरबार या पाच जिल्ह्यातील १८ साखर कारखान्यांनी यंदाच्या गाळप हंगामात सहभाग नोंदविला होता. आपल्या क्षमतेच्या तुलनेत चालू न शकलेल्या या १८ कारखान्यांपैकी बहुतांश साखर कारखान्यांचा गाळप हंगाम फेब्रुवारी व मार्च महिन्यातच उरकला. नंदुरबार जिल्ह्यातील ३ साखर कारखान्यांनी ७ लाख ४३ हजार मेट्रिक टन उसाचे गाळप करताना १०.२५ टक्के साखर उताऱ्याने सात लाख ६१ हजार क्विंटल साखरेचे उत्पादन केले. 

जळगाव जिल्ह्यातील एका कारखान्याने १ लाख ४३ हजार ५९२ मेट्रिक टन उसाचे गाळप केले. तर, सरासरी १०.६८ च्या साखर उतारा १ लाख ५३ हजार क्विंटल साखरेचे उत्पादन केले. औरंगाबाद जिल्ह्यातील ५ साखर कारखान्यांनी ५ लाख ३५ हजार मेट्रिक टन उसाचे गाळप, तर ५ लाख २५ हजार क्विंटल साखरेचे उत्पादन सरासरी ९.५% साखर उतारा राखत केले. जालना जिल्ह्यातील ४ साखर कारखान्यांनी १२ लाख ३७ हजार मेट्रिक टन उसाचे गाळप केले. तर, १३ लाख ३७ हजार ८४० क्विंटल साखरेचे उत्पादन १०.८० साखर उतारा राखत केले.  बीड जिल्ह्यात ५ कारखान्यांचे गाळप 

बीड जिल्ह्यातील ५ साखर कारखान्यांनी यंदा गाळप केले. त्यांनी १० लाख २३ हजार मेट्रिक टन उसाचे गाळप करून ९ लाख १२ हजार क्विंटल साखरेचे उत्पादन केले. तर, सरासरी ८.९१ टक्के साखर उतारा राखला. पाचही कारखान्यांनी सरासरी ९.७४ टक्के, तर खासगी कारखान्यांनी १०.५ टक्के साखर उतारा राखल्याची माहिती साखर विभागाच्या सूत्रांनी दिली.