‘इथेनॉल'मुळे जादा दर देणे शक्‍य : शिंदे

सोलापूर : ‘‘केंद्र सरकारने साखरेच्या दराबरोबरच इथेनॉलच्या दरासंदर्भात चांगला निर्णय घेतला आहे. उसाची रिकव्हरी कमी झाली, तरी इथेनॉलमुळे शेतकऱ्यांना चांगला दर देणे शक्‍य होणार आहे,'' असे मत माढ्याचे आमदार बबनराव शिंदे यांनी व्यक्त केले.

कुमठे येथील श्री सिद्धेश्‍वर सहकारी साखर कारखान्याच्या ४६ व्या गळीत हंगामाचा प्रारंभ आमदार शिंदे यांच्या हस्ते झाला. अध्यक्षस्थानी माजी आमदार राजन पाटील होते. राज्य बॅंकेचे प्रशासकीय संचालक अविनाश महागावकर या वेळी उपस्थित होते.

शिंदे म्हणाले, ‘‘सरकारची काही धोरणे चुकीची किंवा त्रासदायक असली, तरी काही धोरणे ही निश्‍चितच शेतकऱ्यांना आणि साखर कारखानदारांना फायद्याची आहेत. त्याचा उपयोग कसा केला जातो, यावर सगळ्या गोष्टी अवलंबून आहेत.''

राजन पाटील म्हणाले, ‘‘मुख्यमंत्र्यांनी साखरेचा दर ३१०० रुपये करावा, अशी मागणी केंद्राकडे केली आहे. हा दर ३५०० रुपये करावा. दिल्लीत सध्या गडकरी यांचे मुख्यमंत्र्यांपेक्षा जास्त चालते आणि गडकरींकडे सुभाषबापूंचे चालते. त्यामुळे त्यांनी मध्यस्थी करून हा दर निश्‍चित करायला भाग पाडावे.''

‘‘पाण्याची कमतरता, हुमणी, डिझेलचे वाढते दर, उसाला अवाजवी दराची मागणी, विजेचे दर, तांत्रिक कर्मचारी व ऊसतोड कामगारांची कमतरता या सर्व आव्हानांना तोंड देत या हंगामाची सुरवात होत आहे. तेव्हा एफआरपी हंगाम सुरू झाल्यानंतर १५ दिवसांत पहिला हप्ता, हंगाम संपल्यानंतर दुसरा हप्ता आणि दिवाळीला तिसरा हप्ता देण्याचा निर्णय व्हावा``, अशी अपेक्षा कारखान्याचे अध्यक्ष धर्मराज काडादी यांनी व्यक्त केली.

कारखान्याचे उपाध्यक्ष ॲड. दीपक आलुरे यांनी स्वागत केले. महागावकर यांनीही मनोगत व्यक्त केले. अशोक बिराजदार यांनी सूत्रसंचालन केले. कार्यकारी संचालक संतोष कुंभार यांनी आभार मानले.