अखेर मोसंबी उत्पादकांना विमा परतावा मिळणे झाले सुरू 

जालना : जिल्ह्यातील सहा हजारांवर मोसंबी उत्पादकांना २०१९ २० मधील मोसंबी पिकाच्या आंबिया बहारासाठी उतरविलेल्या विम्याचा परतावा मिळणे सुरू झाले आहे. यासंदर्भात शेतकऱ्यांच्या पाठपुराव्याला ॲग्रोवनने प्रकर्षाने बाजू मांडून वाचा फोडण्याचे काम केले होते. 

यासंदर्भात अधिक माहितीनुसार, जालना जिल्ह्यातील मोसंबी उत्पादक शेतकऱ्यांना २०१९ -२० मधील मोसंबी फळ पिकाच्या आंबिया बहारासाठी उतरविलेल्या विम्याची प्रतीक्षा होती. आंबिया बहारासाठी विमा उतरविलेल्या पिका पैकी डाळिंबाचा पीक विमा परतावा मिळाला. परंतु मोसंबीचा विमा मंजूर होऊनही मिळत नव्हता. यासंदर्भात मोतीगव्हाण येथील शेतकरी प्रताप मोहिते यांनी शेतकऱ्यांसह जिल्हा अधीक्षक कृषी अधिकारी कार्यालय गाठून निवेदन सादर केले होते. 

मंजूर झालेला मोसंबीचा पीकविमा शेतकऱ्यांना तात्काळ देण्यात यावा, व विमा देण्यासाठी विमा कंपनीला बाध्य करण्यात यावे, अशी मागणी मोहिते यांनी निवेदनातून केली होती. यासंदर्भातील वृत्त ॲग्रोवनमधून प्रकाशित झाल्यानंतर कृषी विभागाकडून शेतकऱ्यांना विमा परतावा मिळावा म्हणून हालचाली गतिमान करण्यात आल्या होत्या. 

अखेर १७ एप्रिल पासून शेतकऱ्यांच्या खात्यावर प्रतीक्षेतील विमा परतावा जमा होणे सुरू झाल्याची माहिती या प्रकरणातील निवेदनकर्ते प्रताप मोहिते व जिल्हा अधीक्षक कृषी अधिकारी बाळासाहेब शिंदे यांनी दिली. जवळपास सहा हजार आठशे शेतकऱ्यांना हा विमा परतावा मिळत असल्याचे श्री. मोहिते म्हणाले. तर घनसावंगी मंडळात हेक्‍टरी २६ हजार ५०० रुपये शेतकऱ्यांच्या खात्यावर जमा होत असल्याचेही मोहिते यांनी स्पष्ट केले.