मराठवाड्यात नवीन खासदारांबाबत उत्कंठा

नांदेड : मराठवाड्यातील आठ लोकसभा मतदारसंघांतील निवडणुकीची मतमोजणी गुरुवारी (ता. २३) सकाळी आठ वाजल्यापासून सुरू होईल. व्हीव्हीपॅट चिठ्ठ्यांची मोजणी केली जाणार असल्याने अंतिम निकाल हाती येण्यास उशीर लागणार आहे. मतमोजणीसाठी प्रशासकीय यंत्रणा सज्ज झाली आहे. निवडणुकीत कोण बाजी मारणार, कोणाचा गड अबाधित राहणार, कोणत्या एक्झिट पोलचे अंदाज खरे ठरणार, याकडे लक्ष लागल्याने मराठवाड्यातील जनतेची उत्कंठा शिगेला पोचली आहे.

मतमोजणी केंद्रावर सकाळी सात वाजता मतमोजणी प्रतिनिधींच्या उपस्थितीत स्ट्रॅांग रूम उघडण्यात येतील. त्यानंतर आठ वाजता टपाली मतपत्रिकांची मोजणी केली जाईल. त्यानंतर साडेआठच्या दरम्यान मतदान यंत्रावरील मतमोजणीस प्रारंभ होईल. प्रत्येक लोकसभा मतदारसंघात समाविष्ट विधानसभा मतदारसंघातील प्रत्येकी पाच मतदान केंद्रांवरील व्हीव्हीपॅट चिठ्ठ्यांची मतमोजणी केली जाणार आहे. त्यामुळे अंतिम निकाल जाहीर करण्यास विलंब लागू शकतो. दुपारी एकनंतर निकालाचे चित्र स्पष्ट होईल. २०१४ च्या निवडणुकीत मराठवाड्यातील आठपैकी सहा जागा भाजप-शिवसेना युतीला, तर दोन जागा काँग्रेसला मिळाल्या होत्या.

लोकसभेच्या औरंगाबाद मतदारसंघाची मतमोजणी चिकलठाणा औद्योगिक वसाहतीमधील संकुलात होईल. शिवसेनेचे खासदार चंद्रकांत खैरे, काँग्रेसचे सुभाष झांबड, अपक्ष हर्षवर्धन जाधव, एमआयएमचे इम्तियाज जलिल यांच्यात लढत होईल. जालना मतदारसंघाची मतमोजणी दावलवाडी (ता. बदनापूर) येथील संकुलात होईल. भाजपचे खासदार रावसाहेब दानवे आणि काँग्रेसचे विलास औताडे यांच्यात लढत आहे.

परभणी मतदारसंघाची मतमोजणी वसंतराव नाईक मराठवाडा कृषी विद्यापीठातील कृषी अभियांत्रिकी महाविद्यालयात मतमोजणी होणार आहे. या ठिकाणी शिवसेनेचे खासदार संजय जाधव आणि राष्ट्रवादी काँग्रेसचे राजेश विटेकर यांच्यात लढत होईल. हिंगोली मतदारसंघाची मतमोजणी तंत्रनिकेतनमध्ये होणार असून, शिवसेनेचे हेमंत पाटील आणि काँग्रेसचे सुभाष वानखडे यांच्यामध्ये लढत आहे.

नांदेड मतदारसंघाची मतमोजणी शासकीय तंत्रनिकेतन येथे होणार असून, काँग्रेसचे खासदार अशोक चव्हाण आणि भाजपचे प्रताप पाटील चिखलीकर यांच्यात लढत आहे. लातूर मतदारसंघात भाजपचे सुधाकर शृंगारे आणि काॅंग्रेसचे मच्छिंद्र कामत यांच्यात लढत आहे.