सांगली जिल्ह्यात निर्यातक्षम द्राक्षांच्या क्षेत्रवाढीची शक्यता

सांगली : यंदा महापूर, अतिवृष्टीमुळे बदलत्या वातावरणाचा सामना करून शेतकऱ्यांनी द्राक्षबागा जगविल्या आहेत. यंदाच्या द्राक्ष निर्यात हंगामासाठी जिल्ह्यातील १ हजार ८८६ शेतकऱ्यांनी नोंदणी केली आहे. १ हजार ०४३ हेक्टर क्षेत्रावरील द्राक्षे युरोपसह अन्य देशांत जाण्यास सज्ज झाली आहेत. नोंदणीची अंतिम मुदत डिसेंबरअखेर आहे. यामध्ये अजून वाढ होईल. त्यामुळे यंदा निर्यातक्षम द्राक्षांचे क्षेत्र वाढेल, अशी माहिती कृषी विभागाच्या सूत्रांनी दिली.

यंदा द्राक्ष हंगामाच्या फळ छाटणीपासून अनेक अस्मानी संकटे आली. त्यावर मात करून द्राक्ष उत्पादक शेतकऱ्यांना द्राक्षबागा वाचविण्यात यश आले. खर्च मात्र दुप्पट झाला. जिल्ह्याचा द्राक्षाचा हंगाम सुरू झाला आहे. चांगला दरही मिळत आहे. त्यामुळे शेतकऱ्यांच्या चेहऱ्यावर समाधानाचे वातावरण आहे. 

देशांतर्गत बाजारपेठेप्रमाणे जिल्ह्यातील द्राक्षांना युरोप देशासह अन्य देशांतूनही मोठ्या प्रमाणात मागणी आहे. दरवर्षी निर्यात करणाऱ्या शेतकऱ्यांच्या संख्येत वाढ होते आहे. गेल्या वर्षी १ हजार ९५८ शेतकऱ्यांनी १०३० हेक्टर क्षेत्राची नोंदणी केली. गतवर्षी जिल्ह्यातून अंदाजे १५ हजार मेट्रिक टन द्राक्षांची निर्यात केली. 

या हंगामात द्राक्षांची निर्यात करणाऱ्या शेतकऱ्यांनी आपले परवाने नूतनीकरण केले. अनेक शेतकऱ्यांनी नव्याने नोंदणी करून आपली द्राक्षे परदेशांत पाठवण्याची तयारी दर्शविली. प्रामुख्याने तासगाव, खानापूरतून द्राक्षाची मोठ्या प्रमाणात निर्यात होते.

तालुकानिहाय निर्यातक्षम द्राक्ष नोंदणी