तज्ज्ञ, अधिकाऱ्यांतर्फे पीक प्रात्यक्षिक पाहणी

औरंगाबाद : जिल्ह्यातील सिल्लोड तालुक्‍यांतर्गत येत असलेल्या काही गावांमधील पीक व कीड नियंत्रणाविषयीच्या उपाययोजनांची कृषी विद्यापीठाचे शास्त्रज्ञ आणि कृषीचे अधिकारी यांनी बुधवारी (ता. ५) पाहणी केली.

या पाहणीत सलग तूर, कपाशीत आंतरपीक मूग, कीड नियंत्रणासाठीचे एकात्मिक व्यवस्थापन, पारंपरिक पद्धतीने विविध पिकांच्या माध्यमातून किडींचे नियंत्रण आदींविषयी निरीक्षणे नोंदविण्यात आली.

वसंतराव नाईक मराठवाडा कृषी विद्यापीठांतर्गत राष्ट्रीय कृषी संशोधन प्रकल्पाचे प्रमुख डॉ. एस. बी. पवार, अधीक्षक कृषी अधिकारी डॉ. तुकाराम मोटे, जिल्हा परिषदेचे कृषी विकास अधिकारी आनंद गंजेवार, उपविभागीय कृषी अधिकारी पी. आर. चव्हाण, तालुका कृषी अधिकारी दीपक गवळी, तंत्र अधिकारी बी. एन. बोंदरवाड, कृषी पर्यवेक्षक एकनाथ मुंडे, रमेश गुंडीले, कृषी सहायक विठ्ठल बोराडे, कृषी सहाय्यिका सारिका पाटील, योगीता मनसुते आदींची उपस्थिती होती.

गेवराई शेमी येथील लिंबाजी सांगळे व मारोती ताठे, दशरथ ताठे यांच्या सलग तूर, कपाशीत आंतरपीक तूर, चिकट सापळे, फेरोमन ट्रॅप यासोबातच अंबाडी राजगीरा, मका आदी पिकाच्या माध्यमातून पारंपरिक पद्धतीने कीड नियंत्रणाच्या प्रात्यक्षिकांची नोंदली गेलेली निरीक्षणे, गुलाबी बोंड अळी नियंत्रणाची अवस्था याविषयी माहिती जाणून घेतली. सलग तूर, तुरीत आंतरपीक शेवगा व भुईमूग आदी शेतकऱ्यांनी केलेल्या प्रयोगाविषयीचीही माहिती तज्ज्ञ व अधिकाऱ्यांनी जाणून घेतली.

एक एकर कपाशीत आंतरपी घेतलेल्या मुगाचे जवळपास दोन क्‍विंटल उत्पादन मिळाल्याची माहिती शेतकरी दशरथ ताठे यांनी दिली. गावात जवळपास एक हजार फेरोमॅन ट्रॅप वाटप केल्याची माहिती कृषी विभागाच्या वतीने देण्यात आली. शिवाय बोंड अळीच्या नियंत्रण जनजागृतासाठी प्रचार रथ पाठविल्याचे सांगण्यात आले. भवनसह हळदा, पानवडोद इतरही शेततळे, पाऊस, त्यामुळे पिकांची अवस्था याविषयी तज्ज्ञ आणि अधिकाऱ्यांनी माहिती जाणून घेतली.