शेतीमध्ये रासायनिक खतांचा वापर टाळण्याचे तज्ज्ञांचे आवाहन

जालना : सेंद्रिय शेतीमध्ये रासायनिक खतांचा वापर टाळा. त्याशिवाय शेणखत, गोमूत्र, प्रॉम, ढेंच्या, बोरू, यासारखे सेंद्रिय खते वापरा, असा सल्ला तज्ज्ञांनी शेतकऱ्यांना दिला. 

कृषी तंत्रज्ञान व्यवस्थापन यंत्रणा (आत्मा) अंतर्गत एकदिवसीय कार्यशाळा रोहनवाडी (ता. जालना) येथे प्रकाश धानुरे यांच्या शेतावर घेण्यात आली. परंपरागत कृषी विकास योजना सेंद्रिय शेतीतंर्गत प्रकल्प संचालक (आत्मा) यांच्या मार्गदर्शनाखाली या कार्यशाळेचे आयोजन करण्यात आले. ‘आत्मा’चे दत्तात्रेय सूर्यवंशी, अर्जुन मद्दलवर, कृषी अधिकारी नंदकिशोर पुंड, कृषी सहायक गणेश रवतुलवाड यांची उपस्थिती होती.

साधारण शेतीचे सेंद्रिय शेतीमध्ये रूपांतर करणे, जैविक बांध-बंदिस्ती करणे, रासायनिक घटकांचा वापर टाळून सेंद्रिय पद्धतीने जैविक शेती करणे, यावर नंदकिशोर पुंड यांनी सविस्तर मार्गदर्शन केले.

‘आत्मा’चे दत्तात्रेय सूर्यवंशी यांनी परंपरागत कृषी विकास योजना सेंद्रिय शेतीची योजना शेतकऱ्यांना सांगितली. रासायनिक कीटकनाशकांची फवारणी टाळून जीवामृत, दशपर्णी अर्क, बीजमृत, निंबोळी अर्क, बिवेरीय बसियाना, मेटारायझियम अनसोपली, यासारखी जैविक कीटकनाशके, बुरशीनाशकांची फवारणी घेण्याचे आवाहन शेतकऱ्यांना करण्यात आले.