खत विक्रेत्यांच्या परवान्यांना ३० जूनपर्यंत मुदतवाढ 

पुणे: खत नियंत्रण आदेशानुसार राज्यात वाटप झालेल्या खतविषयक परवान्यांना आता ३० जूनपर्यंत मुदतवाढ मिळणार आहे. केंद्र शासनाच्या आदेशानंतर हा निर्णय घेण्यात आल्याचे सूत्रांनी स्पष्ट केले.  केंद्रीय कृषी व शेतकरी कल्याण मंत्रालयाच्या उपसचिव रजनी तनेजा यांनी कृषी आयुक्तालयाला तशा लेखी सूचना दिल्या आहेत. लॉकडाऊनमुळे परवान्यांची प्रक्रिया पार पाडण्यात अडचणी असल्यामुळे ही मुदतवाढ देण्यात आली आहे.  “खत नियंत्रण आदेश १९८५ मधील ११ व्या कलमानुसार खत विक्रेत्यांनी परवान्याचे नूतनीकरण करणे अत्यावश्यक ठरते. तथापि, या प्रक्रियेला अडचणी येत असल्याच्या तक्रारी विक्रेत्यांनी केल्या आहेत. मंत्रालयाने या तक्रारींची तपासणी केल्यानंतर मुदतवाढीचा निर्णय घेण्यात आला,” अशी माहिती उद्योग सूत्रांनी दिली.  दरम्यान, २० फेब्रुवारी ते ३० जून या कालावधीत मुदत समाप्त होत असलेल्या परवान्यांना ही मुदतवाढ राहील, असे कृषी मंत्रालयाचे म्हणणे आहे. 

लॉकडाऊन सुरू असल्यामुळे खत विक्रीसारखी अत्यावश्यक सेवा देण्यात खत उद्योगाला अडचणी येवू शकतात. त्यामुळे या यंत्रणेचा त्रास टाळण्यासाठी मुदतवाढीच्या प्रक्रियेची तातडीने अंमलबजावणी करावी, असे आदेश देखील केंद्र शासनाने दिले आहेत. 

ऑल इंडिया अॅग्रो इनपुट डिलर्स असोसिएशनचे अध्यक्ष मनमोहन कलंत्री यांनी या निर्णयाचे स्वागत केले आहे. देशातील लाखो खत विक्रेत्यांना या निर्णयाचा फायदा होईल, असे ते म्हणाले. “२१ मार्चपासून निविष्ठा परवान्यांचे नूतनीकरण रखडले होते. नूतनीकरणाची मुदत जूनपर्यंत वाढवून मिळण्याची विनंती आम्ही केंद्रीय कृषी मंत्रालयाकडे केली होती. पण हा मुद्दा केंद्रीय विधी मंत्रालय तपासण्यासाठी पाठवला गेला होता,” असे श्री. कलंत्री म्हणाले.