सोलापूर जिल्ह्यात रोपवाटिका योजनेच्या अर्जासाठी दोन नोव्हेंबरपर्यंत मुदतवाढ

सोलापूर : जिल्ह्यातील भाजीपाला उत्पादनाला प्रोत्साहन देऊन शेतकऱ्यांचे उत्पन्न वाढविण्यासाठी राज्य शासनाने पुण्यश्‍लोक अहिल्यादेवी होळकर रोपवाटिका योजना सुरू केली आहे. या योजनेचा लाभ घेण्यासाठी दोन ऑक्‍टोबर ते १९ ऑक्‍टोबरपर्यंत अर्ज स्वीकारण्याची मुदत दिली होती. मात्र, या योजनेत शेतकऱ्यांचा सहभाग वाढविण्यासाठी दोन नोव्हेंबरपर्यंत अर्ज स्वीकृतासाठी मुदतवाढ देण्यात आली आहे.

पुण्यश्‍लोक अहिल्यादेवी होळकर रोपवाटिका योजना प्रकल्प स्वरूपात राबवायची आहे. यासाठी राज्य शासनाकडून ५० टक्के अनुदान देण्यात येणार आहे. मात्र, शेडनेटमधील चारही घटकांची एकाच ठिकाणी उभारणी करणे बंधनकारक आहे. टोमॅटो, वांगी, कोबी, फुलकोबी, मिरची, कांदा आणि इतर भाजीपाला पिकांसाठी रोपवाटिका उभारणे गरजेचे आहे.

शेडनेटगृह १००० चौरस मीटरमध्ये ३.२५ मी. उंचीचे ग्रीड साईज, ६ मीटर बाय ६ मीटर सांगाडा उभारणीचा खर्च ३ लाख ८० हजार रुपये (अनुदान- एक लाख ९० हजार रुपये), पॉली टनेल १००० चौरस मीटरमध्ये प्रकल्प खर्च ६० हजार रुपये (अनुदान ३० हजार रुपये), एक पॉवर नॅपसॅक स्पेअरचा खर्च ७६०० रुपये (अनुदान ३८०० रुपये), ६२ प्लास्टिक क्रेटसचा खर्च १२ हजार ४०० रुपये (अनुदान ६२०० रुपये) असा एकूण खर्च ४ लाख ६० हजार रुपये आहे. यासाठी २ लाख ३० हजार रुपयांचे अनुदान मिळेल. 

महिला शेतकरी, शेतकरी गटांना प्राधान्य

या योजनेचा लाभ घेण्यासाठी अर्जदाराकडे स्वत:च्या मालकीची एक एकर जमीन आणि पाण्याची कायमची सोय हवी. महिला कृषी पदवीधारकांना प्रथम प्राधान्य देण्यात येईल.

महिला शेतकरी गटाला द्वितीय प्राधान्य राहील. यानंतर भाजीपाला उत्पादक अल्प आणि अत्यल्प भूधारक शेतकरी आणि शेतकरी गटांना प्राधान्य असेल. इच्छुक शेतकऱ्यांनी https://mahadbtmahait.gov.in या संकेतस्थळावर किंवा तालुका कृषी अधिकाऱ्यांकडे अर्ज करावयाचे आहेत.