इंडोनेशियात कच्च्या साखरेची जादा निर्यात शक्य

कोल्हापूर : भारताच्या दृष्टीने साखर निर्यातीसाठी महत्त्वाच्या असणाऱ्या इंडोनेशियाने अखेर भारतातून आयात होणाऱ्या कच्या साखरेच्या इकुम्साची मर्यादा (साखरेच्या शुद्धतेचे मानांकन) १२०० वरून ६०० इतकी घटविल्याने आता या देशात साखर वेगाने निर्यात करणे शक्‍य होणार आहे. इंडोनेशिया सरकारच्या वतीने हा बदल नुकताच निश्‍चित करण्यात आला. साखरेच्या बदल्यास भारताने मलेशियाकडून पाम तेल खरेदी करावे, या उद्देशाने हा बदल करण्यात आला आहे.  गेल्या काही दिवसांत भारतातून साखर निर्यात वाढत आहे. मलेशिया व इंडोनेशिया हे निर्यातीसाठी महत्त्वाचे देश आहेत. भारतात ४०० ते ८०० इकुम्सा साखर तयार होते. १२०० इकुम्सा साखर तयार करणे भारताला सहज शक्‍य होत नाही. पण इंडोनेशियाने हे मापदंड न स्वीकारता १२०० इकुम्सा साखरच स्वीकारायची हे धोरण ठरविले होते. पर्यायाने या देशात भारताची साखर निर्यात होण्यास मर्यादा येत होत्या. भारत हा इंडोनेशियाकडून पामतेल आयात करतो. पामतेलासाठी भारताने आयात शुल्क कमी करावे, त्या बदल्यास भारताकडून साखर घेतली जाईल, असे ठरले होते.  भारताने आयात शुल्क कमी केले खरे, पण इंडोनेशियाकडून मात्र साखरेची मागणी झाली नव्हती. भारताने साखरेवरील निर्यात शुल्क कमी करूनही साखरेला मागणी इंडोनेशियाकडून होत नसल्याने भारतातून नाराजी व्यक्त होत होती. भारताने पामतेल जास्तीत जास्त खरेदी करावे यासाठी इंडोनेशिया सरकारने अखेर इकुम्साची मर्यादा घटवून भारतातून साखर आयातीस परवानगी दिली आहे. अटीत सुधारणा केल्याने आता भारताला निर्यातीची मोठी संधी चालून आली आहे.  गेल्या वर्षी केंद्र सरकार व राष्ट्रीय साखर महासंघाच्या संयुक्त पदाधिकाऱ्यांनी इंडोनेशियाला भेट देऊन तेथील अधिकाऱ्यांची भेट घेतली होती. भारतीय कच्च्या साखरेची निर्यात इंडोनेशियात कशी फायदेशीर आहे. आणि या बदल्यात पामतेल भारतासाठी कसे उपयुक्त ठरू शकते याबाबत सविस्तर चर्चा केली होती. दोन्ही देशांना पूरक फायदेशीर बाबी असल्याने आयात निर्यात धोरणात दोन्ही देशांनी थोडी शिथिलता आणल्यास दोघांनाही फायदेशीर ठरेल, असे मत या वेळी मांडण्यात आले होते. यानंतर एक वर्षाने इंडोनेशियाने साखर निर्यातीसाठीचे काही नियम शिथिल करून भारताला साखर निर्यातीची संधी उपलब्ध करून दिली आहे.