नाशिक : निसर्ग चक्रीवादळाने जिल्ह्यात दुपारनंतर उग्र रूप धारण केले. त्यानंतर बुधवार(ता.३) सोसाट्याचा वारा सुटला. जोरदार वाऱ्यासह पावसाचे प्रमाण वाढल्याने नांदगाव, निफाड, चांदवड, सटाणा तालुक्यात तुरळक ठिकाणी फळबागांसह उसाची पिके आडवी झाली. सायंकाळी वारा अधिक असल्याने शेतकरी धास्तावले होते.
इगतपुरी-त्र्यंबकेश्वरकडून जाणारे वादळ दक्षिणेकडे झुकल्याने ते इगतपुरीतून पूर्वेकडे सिन्नर-येवला या पूर्व भागातील तालुक्यांमध्ये झेपावले. दुपारनंतर जोरदार वारे वाहू लागल्याने सिन्नर तालुक्याच्या पूर्व भागातील अनेक गावांमध्ये दाणादाण उडाली. जिल्ह्यात सर्वाधिक पाऊस सिन्नर तालुक्यात झाला. तर, सर्वांत कमी पाऊस नांदगाव तालुक्यात झाला. पूर्वेकडील तालुक्याच्या दिशेने घुसले. सिन्नर औद्योगिक वसाहतींना वादळाचा फटका बसला. यामुळे गुरुवारी (ता.४) नाशिक शहरासह सिन्नर औद्योगिक वसाहतीत पाणीपुरवठा होणार नसल्याचे यंत्रणेकडून सांगण्यात आले.
नांदगाव तालुक्याच्या पूर्व भागात बोराळे येथे बी.डी राजपूत यांची काढणीसाठी आलेली केळी बाग जमीनदोस्त झाली. राहुरी येथे विजेच्या धक्क्याने महिला ठार झाली. निफाड तालुक्यात मोठ्या प्रमाणावर ऊस लागवडी आहेत. कसबे सुकेणे, थेरगाव परिसरात उसाचे पीक आडवे झाले. पिंपळगाव बसवंत परिसरात तीन मेंढ्या मृत्युमुखी पडल्या. द्राक्ष बागांमध्ये खरड छाटणीनंतर ज्या बागांना नवीन पालवी फुटून काडी तयार होत आहे, त्या नवीन काड्या बाधित झाल्या.
बागलाण तालुक्यात चांगला पाऊस झाला. तालुक्यातील भाक्षी येथील शेतकरी गोरख रौदळ यांची डाळिंब बाग वाऱ्यामुळे उन्मळून पडली. चांदवड तालुक्यातील दह्याने येथे जीवन बाळासाहेब भवर यांची द्राक्षबाग वाऱ्याच्या तडाख्यात लोखंडी अँगल वाकल्याने आडवी झाली. त्याची माहिती जिल्हा प्रशासनाकडून घेतली जात आहेत. येवला तालुक्यातील बुधवार(ता.३) रोजी पोल्ट्री शेडचे झालेल्या नुकसानीचे पंचनामे करण्यात आले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.