मराठवाड्यात अतिपाऊस खरीप पिकांच्या मुळावर

औरंगाबाद : मराठवाड्यात गत काही दिवसांपासून अनेक भागात कमी अधिक प्रमाणात सुरू असलेला पाऊस पिकांच्या मुळावर उठला आहे. आधी मुगाची नासाडी आणि आता काढणीला आलेल्या सोयाबीन, उडदाला त्याने दणका दिला आहे. त्यामुळे शेतकऱ्यांचे मोठे आर्थिक नुकसान झाले आहे. 

पावसाच्या संततधारीने काढणीला आलेल्या मुगाचे अनेक भागात नुकसान झाले. आता उडीद, सोयाबीन भुईसपाट झाले आहे. औरंगाबाद, जालना, बीड, उस्मानाबाद, लातूर, परभणी हिंगोली, नांदेड या पाचही जिल्ह्यांत नदीकाठच्या, ओढ्याकाठच्या पिकांना पुराचा फटका बसला आहे.

परभणी जिल्ह्यात इंद्रायणी नदीला आलेल्या पुरामुळे सुक्रे पिंपळगाव, दैठना, इंदेवाडी, भारस्वाडा, हिंगोली जिल्ह्यात कयाधू नदीला पूर आला आहे. त्यामुळे सेनगाव, कळमनुरी आदी तालुक्यात पिकांमध्ये पाणी घुसून मोठे नुकसान झाले. 

उस्मानाबाद तालुक्यात कसबे तडवळेसह गोपाळवाडी, खामगाव, दुधगाव कोंबडवाडी, जवळे , रुई, तुगाव, खेड व कळंब तालुक्यातील वाघोली, सातेफळ सौंदणा, गौर, दहीफळ, सापनई या शिवारात जोरदार पाऊस पडला. लहान मोठ्या नदी नाल्या तुडुंब झाल्या. तेरणा नदी देखिल दुतर्फा भरुन वाहिली. पावसाच्या तडाख्यात उसाचे फड अक्षरशः जमीनदोस्त झाले. सोयाबीन पाण्यात बुडाले आहे.  उसाचे पावसाच्या तडाख्याने होत्याचे नव्हते झाले. मोठी हानी झाली. एका रात्रीत वर्षभरातील कष्ट मातीमोल झाले. निसर्गाने भाकरीच हिरावून घेतली.  - भागवत डोंगरे, शेतकरी सापनई, ता. कळंब  .....  शेवगळ परिसरात जोरदार पाऊस आसाच सुरू राहिला, तर सोयाबीन व कापूस ही पिके हाती लागणार नाहीत. मूग पीक हातचा गेला. आता सोयाबीन व कापूस पिकाला फटका बसला.  - संदिप लोंढे- पाटील, शेवगळ, ता. घनसावंगी, जि. जालना  ....  पंधरवड्यापासून सतत पाऊस सुरू आहे. २ एकरातील सोयाबीन काढणीला आले. पाऊस लागून बसला. त्यामुळे मोठे नुकसान झाले.  - ज्ञानोबा तिडके, पांगरी. ता, परळी, जि. बीड.