मतदान केंद्रांवर दिव्यांग मतदारांसाठी सुविधा बंधनकारक : डॉ. दीपक म्हैसेकर

सोलापूर  : ‘‘जिल्ह्यातील सर्व विधानसभा निवडणूक निर्णय अधिकाऱ्यांनी दिव्यांग मतदारांची मतदान केंद्रनिहाय माहिती घ्यावी. प्रत्येक मतदान केंद्रावर दिव्यांग मतदारासाठी आवश्‍यक असलेल्या रॅम्प, व्हिल चेअर आदी सुविधांची उपलब्धता केली असल्याची खात्री करावी, या सुविधा उपलब्ध करून देणे बंधनकारक आहे’’, असे विभागीय आयुक्त डॉ. दीपक म्हैसेकर यांनी सांगितले.

जिल्हाधिकारी कार्यालयाच्या सभागृहात आयोजित विधानसभा सार्वत्रिक निवडणूक २०१९ पूर्व तयारीबाबतच्या आढावा बैठकीत विभागीय आयुक्त म्हैसेकर बोलत होते. या वेळी जिल्हाधिकारी डॉ. राजेंद्र भोसले, उपायुक्त चव्हाण, पिंपळगावकर, शहर पोलिस आयुक्त अंकुश शिंदे, मुख्य कार्यकारी अधिकारी प्रकाश वायचळ, महापालिका आयुक्त दीपक तावरे, अप्पर जिल्हाधिकारी संजीव जाधव, अति. पोलिस अधीक्षक अतुल झेंडे, निवासी उपजिल्हाधिकारी अजित देशमुख, उपजिल्हा निवडणूक अधिकारी स्नेहल भोसले आदी उपस्थित होते. 

सर्व निवडणूक निर्णय अधिकारी व नोडल अधिकाऱ्यांनी आदर्श आचारसंहितेचे तंतोतंत पालन करावे. प्रत्येकाने आदर्श आचारसंहितेची काटेकोरपणे अंमलबजावणी करावी, असे आवाहनही डॉ. म्हैसेकर यांनी केले. डॉ. भोसले यांनी विधानसभा निवडणुकीचे कामकाज शांततामय वातावरणात पार पाडण्याची खात्री दिली.