राजापुरात भातावर लष्करी अळी

रत्नागिरी : राजापूर तालुक्यात परिपक्व झालेल्या भातावर लष्करी अळीचा प्रादुर्भाव आढळून आला आहे. पुराच्या तडाख्यातून वाचलेल्या नदी काठावरील शेकडो एकर भातशेतीचे नुकसान होण्याची शक्यता आहे. या संदर्भात कृषी विभागातर्फे पाहणी सुरू झाली आहे.

राजापूर तालुक्यातील शिवणे, शीळ, धामणपे आदी गावांमधील भातशेतीवर मोठ्याप्रमाणात लष्करी अळीचा प्रादुर्भाव झाला आहे. त्या अनुषंगाने कृषी विभागातर्फे शेतकऱ्यांशी संवाद साधण्यात आला. प्रादुर्भावग्रस्त भाताची कापणी करण्यासाठी आठ-दहा दिवसांचा कालावधी आहे. त्या  ठिकाणी किटकनाशकांची फवारणी करणे शक्य आहे. मात्र, दोन दिवसांमध्ये कापणी करणे गरजेचे आहे. तेथे कोणत्याही किटकनाशकांची फवारणी न करता शेतकऱ्यांनी कापणी उरकून घ्यावी, असे आवाहन कृषी विभागाने केले आहे. 

भातावरील लष्करी अळीचे नियंत्रण करण्यासाठी आवश्यक असलेली किटकनाशके सद्यस्थितीमध्ये कृषी विभागात उपलब्ध नाहीत. मात्र जिल्हा परिषदेच्या सेस फंडातून शेतकऱ्यांना त्यांच्या खरेदीसाठी अनुदान उपलब्ध करून देण्यासाठी प्रयत्न सुरू असल्याची माहिती कृषी विभागाने दिली. 

पुराच्या तडाख्यात बचावलेला भात परिपक्व होऊन कापणी योग्य झाला आहे. आता लष्करी अळीच्या प्रादुर्भावातून वाचविण्यासाठी शेतकऱ्यांची धडपड सुरू आहे. नद्यांच्या काठावरील भागात त्याचे प्रमाण जास्त आहे. पावसामुळे भात कापता येत नाही. प्रादुर्भावग्रस्त भातावर फवारणी केल्यास काढलेल्या भातामध्ये किटकनाशकांची मात्रा राहण्याची शक्यता नाकारता येत नाही. त्यामुळे किटकनाशकांची फवारणी कशी करायची, अशा दुहेरी कात्रीमध्ये शेतकरी सापडला आहे. 

परिपक्व पिकांची रात्रीच्यावेळी नासाडी केल्यानंतर ही अळी जमिनीच्या भेगांमध्ये किंवा पिकांच्या मुळाजवळ लपून बसते. दमट, ढगाळ वातावरण या किडीला पोषक असते. नदीलगतच्या पिकांवर ही कीड अधिक प्रमाणात आढळून येते. याविषयी शेतकऱ्यां‍शी संवाद सुरू असल्याचे तालुका कृषी अधिकारी एस. एस. जगताप यांनी सांगितले.