पिंपळगावला आडत्याकडून शेतकऱ्याला मारहाण 

नाशिक: निफाड तालुक्यातील कारसूळ येथील शेतकरी जितेंद्र जाधव यांनी पिंपळगाव बसवंत बाजार समितीत टोमॅटो विक्री केला. व्यवहाराचे पैसे घेण्यासाठी गेले असता अडत्याने पैसे देण्यास टाळाटाळ केली. पैसे द्या, नाहीतर लिहून द्या, अशी मागणी केली असता आडत्याने शिवीगाळ करत मारण्याची धमकी दिली. एवढ्यावर न थांबता आडत्याकडून मारहाण झाल्याची फिर्याद श्री. जाधव यांनी पिंपळगाव बसवंत पोलिस ठाण्यात दिली आहे. 

याबाबत दिलेल्या फिर्यादीनुसार, २२ ऑक्टोबरला संत सावता आडत यांच्याकडे टोमॅटो दिले. २३ ऑक्टोबरला विक्री केलेल्या टोमॅटोचे पैसे घेण्यासाठी बाजारात गेले. यावेळी आडत दुकानात हजर असलेल्या दत्तात्रय गोविंद विधाते यांची मुले किशोर व ज्ञानेश्वर विधाते (रा. शिवाजीनगर, पिंपळगाव ब., ता.निफाड) यांनी आज पैसे मिळणार नाही, असे सांगितले. मात्र आज पैसे पाहिजे, नाही तर पावतीवर लिहून द्या, अशी श्री. जाधव यांनी मागणी केली. यावर त्यांना बाजूला थांबवून ठेऊन दुसऱ्या लोकांना पैसे देत होते. यावर मला पण पैशांची गरज असल्याचे त्यांनी सांगितले. त्यावर शिवीगाळ करुन जिवे मारण्याची धमकी दिली. जाधव हे धमकी देऊ नका असे सांगत असताना किशोर याने वस्तूने मारल्याने श्री. जाधव यांना डोक्यात दुखापत झाली. पुन्हा लाथा-बुक्यांनी मारहाण करून शिवीगाळ, दमदाटी करून आडत दुकानाच्या बाहेर ढकलून दिल्याचे श्री. जाधव यांनी म्हटले आहे. 

संबंधितांवर पोलिस ठाण्यात गुन्ह्याची नोंद करण्यात आलाय आहे. पोलिस हवालदार श्री. गांगुर्डे पुढील तपास करत आहेत. 

प्रतिक्रिया ही बाब गांभीर्याने घेत याबाबत अधिक माहिती घेतली जात आहे. असे गैरप्रकार घडणार नाही याबाबत बाजार समिती दक्ष आहे. त्यामुळे शेतकरी हित प्राधान्याने विचारात घेतले जाईल.  - बाळासाहेब बाजार, सचिव, कृषी उत्पन्न बाजार समिती, पिंपळगाव बसवंत.