पुसदमध्ये शेतकरी कंपन्यांतर्फे भाजीपाल्याची थेट विक्री

यवतमाळ : ‘लॉकडाऊन’च्या पार्श्‍वभूमीवर पुसद येथे शेतकरी उत्पादक कंपनीच्या माध्यमातून शेतकरी ते ग्राहक थेट भाजीपाला विक्री केली जात आहे. 

‘कोरोना’मुळे लॉकडाऊन जाहीर करण्यात आला. या काळात ग्राहकांना अत्यावश्‍यक सेवा म्हणून भाजीपाला विक्रीची मुभा देण्यात आली आहे. ही दुकाने मोजकीच असल्याने त्या ठिकाणी गर्दी होते. त्यामुळे कोरोना संसर्गाचा धोका संभवतो. त्यामुळे पुसद तालुका कृषी तंत्रज्ञान व्यवस्थापन यंत्रणा (आत्मा), कृषी विभागाच्या सहकार्याने शेतकरी उत्पादक कंपनीकडून थेट घरपोच ताजा भाजीपाला व फळांचा पुरवठा होत आहे. 

वेणी येथील संत खप्ती शेतकरी उत्पादक कंपनीने पुढाकार घेतला आहे. गेल्या दोन दिवसांत जवळपास चार टन भाजीपाला, चार क्‍विंटल फळे व पाच क्‍विंटल विविध डाळी शहरातील विविध भागात घरपोच पुरविण्यात आल्या, अशी माहिती कंपनीचे संचालक रविंद्र पुंड यांनी दिली. 

संचारबंदीच्या काळात शेतकरी उत्पादक कंपनी व शेतकरी गटांना सुरक्षित वाहतूक करता यावी, यासाठी महसूल व कृषी विभागाकडून वाहतूक पास व ओळखपत्र देण्यात आले आहे. हा उपक्रम उपविभागीय कृषी अधिकारी डॉ. प्रशांत नाईक यांच्या मार्गदर्शनाखाली तालुका कृषी अधिकारी शुभम बेरड, मंडळ कृषी अधिकारी ए. के. वडकुते, बि. डी. चेक, एन. एस. राठोड, ‘आत्मा’चे तालुका तंत्रज्ञान व्यवस्थापक एस. डी. मोरे, कृषी सहाय्यक एस. के. राठोड राबवित आहेत.