सांभाळ अशक्य झाल्याने पक्षी नष्ट करण्याची वेळ

हिंगोली ः कोरोना विषाणू प्रसार चिकनव्दारे होत असल्याच्या अफवा पसरविण्यात आल्याचा खूप मोठा फटका जिल्ह्यातील पोल्ट्री व्यावसायिकांना बसला आहे. चिकनला मागणी नसल्यामुळे पक्ष्यांचा सांभाळ्यासाठी खर्च करणे शक्य होत नाही. त्यामुळे पोल्ट्री व्यावसायिकांवर पक्षी नष्ट करण्याची वेळ आली आहे.  गेल्या दोन महिन्यांपासून कोरोना विषाणूच्या अफवेमुळे चिकन आणि अंडी यांच्या विक्रीत मोठी घट झाली आहे. पक्षी संगोपनावर प्रतिकिलोस सुमारे ७५ रुपये खर्च येत आहे तर चिकन चे दर प्रतिकिलो ८ ते १० रुपये एवढे कमी होऊनही ग्राहकांकडून मागणी नाही. एका अंड्याचा उत्पादन खर्च ३ रुपये ८० पैसे असून मोफत दिली दिले तरी ग्राहक घ्यायला तयार नाहीत. मागच्या दोन वर्षांपासून तयार खाद्य तसेच मका सोयाबीन, तांदूळ आदी कच्चा माल तसेच औषधी, मजुरी आदीच्या दरामध्ये वाढ झाली आहे. बँकेकडून घेतलेल्या कर्जाची परतफेड करणे शक्य होत नाही. आर्थिक अडचणीत आल्यामुळे दरेगाव येथील पोल्ट्री व्यावसायिक लक्ष्मण जाधव पक्षी खड्डा खोदून जमिनीत गाडून टाकावी लागली. पोल्ट्री व्यावसायिकांना शासनाने आर्थिक मदत करावी, अशी मागणी जिल्हा ब्रॉयलर आणि लेयर पोल्ट्री व्यावसायिक लक्ष्मण जाधव, सुनील जाधव, दुर्गादास राठोड, डॉ. केशव वाघमारे, मुक्तार कुरेशी, गणेश नागरे, डॅा. सुभाष निरगुडे, प्रकाश फेगडे आदींनी जिल्हाधिकारी रुचेश जयवंशी यांच्याकडे दिलेल्या निवेदनाव्दारे केली आहे.