कर्ज एक लाख ४० हजार अन् कर्जमाफी साडेदहा हजार

उस्मानाबाद ः एक लाख ४० हजार रुपयांचे कर्ज असताना केवळ १० हजार ४०० रुपयांचे कर्जमाफी प्रमाणपत्र देण्यात आले. उर्वरित एक लाख ३० हजार रुपयांची कर्जमाफी का झाली नाही, असा प्रश्न उपस्थित करीत भारत तांबे यांनी कर्जमाफीचे प्रमाणपत्र जिल्हा उपनिबंधकांना परत केले. जिल्ह्यातील काही शेतकऱ्यांना प्रातिनिधिक स्वरूपात १८ ऑक्टोबर रोजी मोठा गाजावाजा करीत सहपालकमंत्री महादेव जानकर यांच्या हस्ते कर्जमाफीचे प्रमाणपत्रे वितरित करण्यात आली. त्यात शेतकरी भारत तांबे यांना बोलावून घेऊन कार्यक्रमात कर्जमाफीचे प्रमाणपत्र देण्यात आले. सरकारच्या पोर्टलवरील यादीत नाव नसल्याने नाराज झालेल्या श्री. तांबे यांनी सोमवारी (ता. २३) हे प्रमाणपत्र जिल्हा उपनिबंधकांना परत केले. कर्जमाफीचे प्रमाणपत्र नको, बँकेत पैसे जमा करा, अशी मागणी करीत श्री. तांबे यांनी हे प्रमाणपत्र सरकारला जमा केले. या वेळी श्री. तांबे यांनी प्रमाणपत्राबरोबरच जिल्हा मुख्यमंत्र्यांच्या नावे लिहिलेले निवेदनही दिले.  जिल्हा बँक व एसबीआय बँकेकडून एक लाख ४० हजार रुपयांचे कर्ज काढले होते. त्यानुसार कर्जमाफीसाठी अर्ज केला होता. परंतु केवळ १० हजार ४०० रुपयांचे कर्जमाफीचे प्रमाणपत्र दिले गेले. मग उर्वरित एक लाख ३० हजार रुपयांची कर्जमाफी का झाली नाही, ती जर होत नसेल तर या प्रमाणपत्राचे काय करायचे, असा प्रश्न त्यांनी या निवेदनाद्वारे केला आहे. जिल्हा उपनिबंधक जगदाळे यांना श्री. तांबे यांनी हे प्रमाणपत्र परत केले असून, बँकांत विचारणा केली तर खात्यात कुठलेही पैसे जमा नसल्याचे सांगण्यात आले. त्यामुळे प्रमाणपत्र परत केल्याचे श्री. तांबे यांनी सांगितले.