वर्षानुवर्षे प्रयोग करणारा शेतकरी शास्त्रज्ञच : डॉ. देवसरकर

बदनापूर जि. जालना : शेतकरी वर्षानुवर्षे शेती करीत आहे. या दरम्यान तो स्वतः च्या प्रक्षेत्रावार विविध प्रयोग करतो. केवळ वैज्ञानिक पद्धतीने कागदोपत्री निरीक्षणे न नोंदविल्याने प्रत्यक्ष प्रकाशझोतात ते येऊ शकत नाहीत. त्यामुळे शेतकरीही खरे शास्त्रज्ञच आहेत,’’ असे मत वसंतराव नाईक मराठवाडा कृषी विद्यापीठाचे विस्तार शिक्षण संचालक डॉ. डी. बी. देवसरकर यांनी व्यक्त केले. 

भारतीय कृषी अनुसंधान परिषद, नवीन दिल्लीच्या नियमानुसार सर्व कृषी विज्ञान केंद्राने संशोधन व तंत्रज्ञानाचा प्रचार व प्रसार शेतकऱ्यांच्या मूलभूत गरजा लक्षात घेऊनच करावा. त्या अनुषंगाने कृषी विद्यापीठ परभणी संचलित कृषी विज्ञान केंद्र, बदनापूर येथे वैज्ञानिक सल्लागार समितीची बैठक बुधवारी (ता. ५) झाली.

तालुका कृषी अधिकारी व्यंकट ठके, बदनापूर ‘केव्हीके’चे प्रभारी अधिकारी डॉ. डी. के. पाटील, मोसंबी संशोधन केंद्र प्रमुख डॉ. संजय पाटील, कृषी महाविद्यालय बदनापूरचे प्रभारी सहयोगी अधिष्ठाता डॉ. एस. एस. माने, शेतकरी संजय मोरे, सुभाष बोडके, नंदा मुळे उपस्थित होत्या. 

वरिष्ठ शास्त्रज्ञ डॉ. सचिनकुमार सोमवंशी यांनी कृषी विज्ञान केंद्र बदनापूरद्वारे घेण्यात आलेल्या विविध प्रक्षेत्र चाचण्या, आद्यरेषीये प्रात्यक्षिके, प्रशिक्षण व कृषी विस्तार कार्यक्रमाचा अहवाल सादर केला. २०२०-२१ साठी कृती आराखडा प्रस्तुत केला. रेशीम उत्पादन तंत्रज्ञान, एकात्मिक शेती पद्धती काळाची गरज, कांदा लागवड व व्यवस्थापन तंत्रज्ञान, गुणकारी बाजरी, शाश्वत शेती आदी विषयावर चर्चा झाली. पुस्तिका व घडीपत्रिकेचे विमोचन झाले. डॉ. राहुल कदम यांनी सूत्रसंचालन केले. डॉ. सचिन धांडगे यांनी आभार मानले.