अतिवृष्टिग्रस्तांना सोमवारपासून मदत : विजय वडेट्टीवार

मुंबई : अतिवृष्टी आणि परतीच्या पावसाने नुकसान झालेल्या शेतकऱ्यांना दिवाळीपूर्वी मदत देण्याची ग्वाही मुख्यमंत्री उद्धव ठाकरे यांनी दिले होती. त्यानुसार सोमवारपासून (ता.९) नुकसानग्रस्त शेतकऱ्यांच्या बँक खात्यात पैसे जमा होण्यास सुरुवात होईल, अशी माहिती मदत आणि पुनर्वसन मंत्री विजय वडेट्टीवार यांनी दिली. राज्यात गेल्या महिन्यात अनेक भागात अतिवृष्टीने शेतीचे प्रचंड नुकसान झाले. ऐन काढणीवर आलेली पिके भुईसपाट झाली होती. उद्धव ठाकरे यांनी बांधावर जाऊन शेतीच्या नुकसानीची पाहणी केली होती. त्यानंतर बाधित शेतकऱ्यांसाठी १० हजार कोटी रुपयांचे पॅकेज जाहीर केले होते. ही मदत शेतकऱ्यांना दिवाळीपूर्वी मिळेल, असे ठाकरे यांनी घोषित केले होते. या पार्श्वभूमीवर गुरुवारी राज्य मंत्रिमंडळाच्या बैठकीनंतर विजय वडेट्टीवार यांनी शेतकऱ्यांना दिल्या जाणाऱ्या मदतीबद्दलची माहिती दिली. निवडणूक आयोगाला मदत वाटपासंदर्भात पत्रही दिले आहे. निवडणूक आयोगाकडून परवानगी मिळालेली आहे. त्यामुळे सोमवारपासून शेतकऱ्यांच्या खात्यात पैसे जमा करण्यास सुरुवात होईल, असे वडेट्टीवार म्हणाले.