कर्जमाफीचे कोडे शेतकऱ्यास सुटेना

परळी, जि. बीड : सहायक निबंधक कार्यालयाकडील कर्जमाफीच्या यादीत नाव दिसते. ते कार्यालय बॅंकेला कळविल्याचे सांगते. बॅंकेकडे गेले तर नाव आले नाही असे सांगितले जाते. त्यामुळे परळी तालुक्‍यातील नागापूरच्या धनंजय सोळंके यांच्या कर्जमाफीचे घोडे कोठे अडले हेच कळत नाही. आपल्यासारखीच स्थिती गावातील काही शेतकऱ्यांची असल्याची माहिती सोळंके यांनी दिली.

परळी तालुक्‍यातील नागपूर येथील धनंजय सोळंके यांनी त्यांच्याकडील कर्जाची माफी मिळण्यात येणाऱ्या अडचणीसंदर्भात परळीचे सहायक निबंधकांना २९ जूनला निवेदन देऊन त्यांना पडलेले कर्जमाफीचे कोडे सोडविण्याची मागणी केली होती. त्यामध्ये मुळचे नागापूर (ता. परळी) येथील रहिवाशी धनंजय सोळंके हे एसबीआयच्या नागापूर शाखेचे ग्राहक आहेत. त्यांचा कर्ज खाते क्रमांक ६२१४३१५२६२०/ ६२१६७१८९९१५ आहे. त्यांच्या कुटुंबाकडे २०१३ पासून थकीत असलेल्या कर्जाची माफी मिळावी म्हणून छत्रपती शिवाजी महाराज शेतकरी सन्मान योजनेअंतर्गत एक वर्षापासून सर्व कागदपत्रासह ऑनलाइन अर्ज केला. गरजेनुसार बॅंकेमध्येही कागदपत्र देऊन सातत्याने पाठपुरावा केला. परंतु कर्जमाफीचा लाभ मिळाला नाही. बॅंक शाखेमध्ये चौकशी केली तर तुमचे नाव यादीत आले नाही, असे सांगितले जाते.

आपल्या कार्यालयाकडे चौकशी केली तर यादी दाखवून पत्नी व माझ्या नावे दीड लाखाची कर्जमाफी तर १६ हजार ६४५ भरावे लागतील असे सांगून यादी बॅंकेला मेल केल्याचे सांगितले जाते. कर्जमाफीच्या गणिताचे कोडे कायम असल्याचे सोळंके यांनी म्हटले होते. परंतु याप्रकरणी आजतागायत काही उत्तर मिळाले नसल्याची माहिती श्री. सोळंके यांनी दिली. त्यामुळे आपल कर्जमाफीचे कोडे सुटले की नाही हा प्रश्न सोळंके यांना पडला आहे.