तीस लाखांची डाळिंबं झाडावरच सुकण्याची भिती; शेतकरी चिंतेत

पुणे : कोरोना लॉकडाउन मुळे शेतमालाची मागणी थंडावल्याने अगोदरच अडचणीत आलेला शेतकरी आता बाजार समित्या बंद झाल्यामुळे अधिक अडचणीत आला आहे. काढणीसाठी आलेली लाखो रुपयांची डाळिंब झाडावरच सुकण्याची भिती निर्माण झाली आहे. दर्जेदार डाळिंबे आता विक्री कशी करायची या विवंचनेत शेतकरी अडकला आहे.  धामणखेल (ता.जुन्नर) येथील डाळिंब उत्पादक शेतकरी राजू कोंडे यांची यंदा ८ एकरवरील डाळिंब काढणीला आले आहेत. लॉकडाउन १४ एप्रिलला संपेल या आशेवर ते होते. मात्र लॉकडाउन वाढल्याने ते आणखी चिंताग्रस्त झाले आहेत. याबाबत कोंडे म्हणाले,‘‘यावर्षी डाळिंबाचे साधारण ३० टन उत्पादनातून सरासरी १०० रुपये किलोला दर मिळण्याची आशा होती. याद्वारे यावर्षी किमान ३० लाखांचे उत्पन्न अपेक्षित होते. गेल्या वर्षी ६० रुपये दराने जागेवरच डाळिंब विक्री केली होती. याद्वारे २२ लाखांचे उत्पन्न मिळाले होते. मात्र कोरोना लॉकडाउनमध्ये शेतमाल वगळला असला तरी वाहतुकीसाठी अडचणी येत आहेत.’’   ‘‘अशातच बाजार समित्या बंद करण्यात आल्या आहेत. मी पुणे, नाशिक, नगर आणि मुंबई बाजार समित्यांमध्ये डाळिंब पाठवीत असतो. यावर्षी मात्र खरेदीदार बागांमध्ये येत नाहीत, मजूर मिळत नाही अशा परिस्थितीत काढणीला आलेले डाळिंब झाडावरच सुकण्याची भिती आहे. लॉकडाऊन सुरू होण्याच्या एक दिवस अगोदर पुणे बाजार समितीमध्ये डाळिंबाचा शेवटचा लिलाव १५० ते ३०० रुपये प्रति किलोने गेला आहे. त्यामुळे आमच्या डाळिंबाला किमान १०० रुपये दर मिळण्याची अपेक्षा होती.’’ 

‘‘डाळिंबाबरोबरच आमची काकडीचे उत्पादन अडीच एकरवर घेतले होते.काकडीचे हंगामात २० तोडे झाले असते. मात्र ८ तोड्यानंतर लॉकडाऊन सुरु झाल्याने काकडीचे पीक अर्धवट सोडले आहे. तशीच परिस्थिती झेंडूच्या फुलांची झाली. झेंडूचा प्लॉट काढून टाकण्याची वेळ आली,’’असेही कोंडे यांनी सांगितले.