विमा कंपनी कार्यालयात शेतकऱ्यांचा ठिय्या

सोलापूर ः पीकविम्याच्या पैशाबाबत सातत्याने पाठपुरावा करूनही दखल न घेतल्याने संतप्त झालेल्या शेतकरी संघटनेच्या कार्यकर्त्यांनी येथील ओरिएंटल पीकविमा कंपनीच्या कार्यालयात जोपर्यंत पैसे देणार नाहीत, तोवर हलायचे नाही, थेट मुक्काम ठोकण्याचा निर्णय मंगळवारी (ता. १७) घेतला आणि शेतकऱ्यांनी कार्यालयातच ठिय्या मारला. त्यामुळे धांदल उडालेल्या अधिकाऱ्यांनी रात्री उशिरा आठवडाभरात पैसे देण्याचे आश्‍वासन दिल्याने आंदोलन मागे घेण्यात आले. 

गेल्या आठवड्यातही संघटनेने अशाच प्रकारचे आंदोलन केले. पण, पूर्ण प्रश्‍न निकाली काढला नाही. बार्शी तालुक्‍यातील अनेक शेतकऱ्यांकडून गतवर्षीच्या खरीप हंगामात पीकविम्यापोटी प्रीमियम भरून घेतला. तसेच त्याच्या भरपाईची रक्कमही मंजूर झाली. पण, शेतकऱ्यांच्या खात्यावर काही ती पडेना, त्यामुळे शेतकरी संघटनेने आक्रमक होत, हा पवित्रा घेतला. 

मंगळवारी थेट पदाधिकाऱ्यांनी सोलापुरातील कंपनीचे कार्यालय गाठले आणि कार्यालयातच मुक्काम ठोकण्याचा निर्णय घेतला. जोपर्यंत शेतकऱ्यांना पीकविम्याचे पैसे दिले जात नाहीत, तोपर्यंत कार्यालयातून न उठण्याचा निर्णय झाला. तत्पूर्वी निवासी उपजिल्हाधिकाऱ्यांना निवेदनही देण्यात आले. त्यानंतर शेतकरी विमा कंपनीत पोचले. पण रात्री उशिरापर्यंत चर्चा सुरू होती. शेवटी आठवडाभरात पैसे देण्याचे आश्‍वासन कंपनीने दिल्यानंतर माघार घेण्यात आली. 

राज्य उपाध्यक्ष शंकर गायकवाड यांच्या नेतृत्वाखाली औदुंबर झाडे, अक्षय उंबरे, पोपट गायकवाड, समाधान आगलावे, दगडू वाघ, अनुरथ आगलावे, विष्णू सुरवसे, उद्धव मुळे, कृष्णा घावटे, नागनाथ गायकवाड, दत्तात्रेय पाटील आंदोलनात सहभागी झाले होते.