कांदा निर्यातबंदीविरोधात मराठवाड्यातही आंदोलने

औरंगाबाद/परभणी: केंद्र सरकारने कांदा निर्यातबंदी केल्याच्या विरोधात बुधवारी (ता.१६) औरंगाबाद, परभणीसह ठिकठिकाणी शेतकरी, राजकीय पक्ष आणि शेतकरी संघटनेने आंदोलन केले. औरंगाबाद जिल्ह्यातील जुने कायगाव (ता. गंगापूर)  येथे शेतकऱ्यांनी रास्तारोको आंदोलन केले. या वेळी निर्यात उठवावी, कांद्याला आणि इतर शेतीमालाला योग्य भाव द्यावा, आदी मागण्यांबाबत गंगापूरचे तहसीलदार अविनाश शिंगटे यांना निवेदन दिले. आंदोलनात प्रहार शेतकरी संघटनेचे उपजिल्हा प्रमुख भाऊसाहेब शेळके, लक्ष्मण मंडवगड, संतोष गायकवाड, राहुल चव्हाण, सुबूर शेख, रामदास वाघ, गणेश खैरे, सुनील धाडगे आदींसह शेतकरी हजर होते.पोलीस निरीक्षक एम टी सुरवसे यांनी चोख बंदोबस्त ठेवला होता.  परभणी जिल्हा व शहर काँग्रेस कमिटीतर्फे निदर्शने करण्यात आली. यावेळी माजी कृषी राज्यमंत्री तथा कॉंग्रेस चे जिल्हाध्यक्ष आमदार सुरेश वरपुडकर, शहर जिल्हा अध्यक्ष नदिम इनामदार, तालुका अध्यक्ष पंजाब देशमुख, रामभाऊ घाडगे, संजय लोलगे, हेमंत आडळकर, बाळकाका चौधरी, गुलाब सिरसकर, तुकाराम साठे आदी उपस्थित होते.  परभणीत स्वाभिमानी शेतकरी संघटनेतर्फे केंद्र सरकारच्या प्रतीकात्मक पुतळ्यास जोडे मारो आंदोलन करण्यात आले. आंदोलनात जिल्हाध्यक्ष किशोर ढगे, केशव आरमळ,डिंगाबर पवार, मुंजाभाऊ लोडे,भास्कर खटींग, शेख जाफर, आदि सहभागी झाले होते.