कांदा बियाणे मिळवण्यासाठी अकोल्यात शेतकऱ्यांची ओढाताण

अकोला ः रब्बी कांदा लागवडीची लगबग सुरु झाली आहे. शेतकऱ्यांची बियाणे उपलब्ध करून घेण्यासाठी ओढाताण सुरु आहे. सध्या कांदा बियाणे मिळत नसल्याने शेतकरी सर्वत्र शोधाशोध करीत आहेत. येथील डॉ. पंजाबराव देशमुख कृषी विद्यापिठाकडे उपलब्ध असलेले तीन-चार क्विंटल बियाणे विकून झाले आहे.

बाजारपेठेत कांद्याला मिळत असलेले दर, आगामी काळातील भावाचा कल लक्षात घेत शेतकरी कांदा लागवडीच्या तयारीला लागले आहेत. या भागात पांढरा कांदा लागवडीला शेतकऱ्यांची पसंती राहते. या कांद्याचे बियाणेच सध्या मिळत नसल्याने शेतकरी जागोजागी संपर्क साधत आहेत. लाल कांद्याचे बियाणे कंपन्यांनी उपलब्ध करुन दिले आहे. हे बियाणेही महाग झाले आहे.

डॉ. पंजाबराव देशमुख कृषी विद्यापिठाकडे यंदा तीन-चार क्विंटल बियाणे उपलब्ध होते. या महिन्यात सुरुवातीलाच हे बियाणे १५०० रुपये प्रतिकिलो दराने विक्री झाले. सध्या विद्यापिठात बियाण्यांसाठी सातत्याने चौकशी केली जात आहे. दरवर्षी इतकी मागणी राहत नाही. यंदा शेतकऱ्यांकडून मागणी होत असल्याचे विद्यापिठातील सूत्रांनी सांगितले.

बीजोत्पादनाकडे कल

वऱ्हाडात अकोला, बुलडाणा, वाशीम या तिनही जिल्ह्यात कांदा बीजोत्पादन केले जाते. सध्या काही खासगी कंपन्यांनी बीजोत्पादनासाठी शेतकऱ्यांसोबत करार सुरु केले आहेत. लागवडीसाठी कांदा २००० रुपये क्विंटल आणि त्यापासून तयार होणारे बियाणे ३५ ते ४० हजार रुपये क्विंटलने खरेदी करण्यात येईल, असे या कराराचे स्वरुप असल्याचे शेतकरी सांगत आहेत. या भागात दरवर्षी कांदा लागवड, बीजोत्पादनाचे क्षेत्र विस्तारत आहे.