शेतकऱ्यांनो पीक कर्जाबाबत निश्चित राहा : जिल्हाधिकारी मांढरे

नाशिक : ‘‘महात्मा फुले शेतकरी कर्जमुक्ती योजनेत पात्र असलेल्या शेतकऱ्यांना लवकर पीक कर्जाचे वाटप करण्यात येणार आहे. त्याबाबतचे पत्र त्यांना बँकांमार्फत देण्यात येईल. तशा सूचना बँकानाही देण्यात आल्या आहेत. त्यामुळे शेतकऱ्यांनी पिक कर्जाच्या बाबतीत निश्चित राहून, खरिपाची कामे वेळेत पूर्ण करावी’’, असे आवाहन जिल्हाधिकारी सूरज मांढरे यांनी केले. 

मांढरे म्हणाले, ‘‘यंदा शेतकऱ्यांना कर्जपुरवठा करण्यासाठी ३ हजार ३०० कोटीचे उद्दिष्ट जिल्ह्याला दिले आहे. शेतकऱ्यांना या हंगामात शेतीची कामे करण्यासाठी वेळेत कर्ज पुरवठा करण्याबाबत सर्व बँक अधिकारी प्रयत्नशील राहतील. काही गावांमध्ये ग्रामपंचायतीच्या निवडणुका असल्यामुळे जिल्ह्यात आचारसंहिता लागू होती. त्यामुळे कर्जमुक्तीची प्रकिया पूर्ण होवू शकली नाही. त्यानंतर कोरोनाचे संकट आले आणि पुढे आधारद्वारे होणारी बायोमॅट्रिक पडताळणी थांबली. संबंधित डिवाइसेस वापरण्यावर बंदी आली. त्यामुळे जिल्ह्यातील १ लाख ३७ हजार शेतकऱ्यांची बायोमॅट्रिक पडताळणी थांबली आहे. हे सारे शेतकरी कर्जमाफीसाठी पात्र आहेत. ही संख्या फार मोठी असल्याने त्यासाठी प्रयत्न करीत आहोत.’’ 

गेल्या वर्षी देखील बँकांनी उत्तम प्रकारे कर्जपुरवठा केला होता. त्याबाबत सर्व व्यावहारिक बाबींचा विचार करून सुयोग्य नियोजन करावे. त्यासाठी सर्व कनिष्ठ कर्मचारी, अधिकाऱ्यांना उद्दिष्ट वाटून देऊन त्याप्रमाणे कालबद्ध पाठपुरावा करावा, असे निर्देश उपस्थित सर्व बँक अधिकाऱ्यांना देण्यात आले.   दर बुधवारी होणार बँकांची बैठक 

मागील आढावा बैठकीनंतर काही बँकांनी स्वयंस्फूर्तीने १०० कोटी रुपयांचे वितरणही केले आहे. ज्या बँकांकडे जास्तीचे उद्दिष्ट आहे, त्यांच्या विभागीय प्रमुखांची बैठक दर बुधवारी घेण्यात येईल. गेल्या वर्षी या प्रयोगातून १५ दिवसांतच कर्जपुरवठ्यात ३०० कोटींनी वृद्धी झाली होती. यावेळी देखील त्याच पद्धतीने कर्जपुरवठा करण्यात येईल. बँक अधिकारीदेखील त्यांच्याकडील सर्व मनुष्यबळाचा योग्य वापर करून जास्तीत जास्त कर्ज वितरण करतील, याची खात्री बाळगावी व हंगामाची तयारी करावी, असे आवाहन मांढरे यांनी केले.