आईचे छत्र हरवलेली शेतकरी कन्या जिद्दीने झाली 'पीएसआय'

अंधारी, ता. सिल्लोड : कुठल्याही क्षेत्रात नावलौकिक करायला, यश संपादन करायला परिस्थिती आड येता काम नये हे ब्रीद अनेकांकडून आपण ऐकत आलो. परंतु ते सत्यात उतरावयला जी मेहनत लागते तिच्या मागचा त्याग खूप मोठा असतो. अशाच प्रकारे काही वर्षांपूर्वी आईचे छत्र हरवलेल्या शेतकरी कन्या असलेल्या पूजाने मेहनत, चिकाटीच्या जोरावर भरारी मारत पोलिस उपनिरीक्षक होण्याचे स्वप्न पूर्ण केले.  दीडगाव येथील पूजा किसन पांढरे ही शेतकरी कुटुंबातील.पूजाच्या आईचे तीन वर्षांपूर्वी अल्पशा निधन झाले, तरी तिने वडील, भाऊ, काका, काकू आदी मंडऴींच्या मदतीने दिवसरात्र अभ्यास केला. पोलिस खात्यातील पीएसआय होण्याचे स्वप्न पूर्ण करीत अभिनंदनास पात्र ठरली. पूजाचे शिक्षण १ ली ते ७ वी दीडगाव जिल्हा परिषद, तर ८ वी ते १२ वी पर्यंत भराडी येथील सरस्वती भुवन येथे, पदवीचे शिक्षण सिल्लोड येथील यशवंत महाविद्यालयात झाले. स्पर्धा परीक्षेची तयारी करिता तिला दादाराव गोराडे यांचे मार्गदर्शन लाभले.  तिचे वडील किसन हे शेतकरी आहेत अल्प शेती, त्यात निसर्गाची साथ नाही, शेती पिकली तरी भाव नाही अशा आर्थिक खडतर स्थितीतही वडील व मामांनी शिक्षणाची उमेद तिच्यात निर्माणच केली नाही, तर सगळे बळ एकवटून तिच्या पाठीशी उभे राहिले. तीन वर्षांपूर्वी तिच्या आईचे छत्र हरवले, घरची जबाबदारी व अभ्यास अशी कसरत करत जिद्दीने स्पर्धा परीक्षेची तयारी करून हे घवघवीत यश संपादन केले. आईच्या चरणी हे यश समर्पित करताना, आज ती हे यश पाहायला असायला हवी होती हे सांगताना तिचा कंठ दाटून आला होता. आपल्या यशाचे श्रेय आपल्याला मार्गदर्शन करणाऱ्या सर्वांनाच तिने दिले आहे. पूजाच्या या यशाबद्दल किसन पांढरे, दादाराव पांढरे, पंढरी पांढरे, संगीता पांढरे यासह नातेवाईक, शिक्षक वृंद, मित्रपरिवाराकडून समाधान व्यक्त केले गेले.