पपईला १६ रुपये दराची खानदेशात शेतकऱ्यांकडून मागणी

जळगाव : खानदेशात मागील काही दिवसांपासून सुरू असलेल्या पपई दरांचा तिढा पुन्हा तयार असून, पपईला जागेवरच १५ ते १६ रुपये प्रतिकिलोचा दर द्यावा लागेल, अशी मागणी शेतकरी करीत आहेत. 

खानदेशात पपईची सर्वाधिक दोन हजार हेक्‍टरपर्यंतची लागवड नंदुरबार जिल्ह्यात केली जाते. यापाठोपाठ जळगाव जिल्ह्यात लागवड असते. खानदेशात मिळून चार ते साडेचार हजार हेक्‍टरवर पपईची लागवड झाली आहे. नंदुरबारमधील शहादा, तळोदा, नंदुरबार, अक्कलकुवा, धुळ्यातील शिरपूर, शिंदखेडा, जळगावमधील चोपडा, यावल, रावेर, जामनेर, जळगाव या भागात पपईची लागवड केली जाते. पपईचे दर खरेदीदारांनी पाडले होते. नोव्हेंबरमध्ये २० रुपये प्रतिकिलोचे दर होते. नंतर १८ रुपये प्रतिकिलोचे दर झाले. यानंतर थेट आठ ते ७ रुपये प्रतिकिलो दरात पपईची खरेदी धुळे, जळगाव व नंदुरबार भागात केली जात होती. शहादा, तळोदा येथील दरांनुसार धुळे व जळगाव जिल्ह्यातही पपईची खरेदी केली जाते. दर परवडत नसल्याने शेतकऱ्यांनी नाराजी व्यक्त केली होती. नंतर बैठक होऊन १३.५१ रुपये प्रतिकिलोचा दर जागेवरच देण्याचा निर्णय झाला होता. परंतु, किमान १५ ते १६ रुपये प्रतिकिलोचा दर मिळावा, कारण यंदा पीक जेमतेम आहे. खर्च अधिक लागला. अतिपावसामुळे सुरुवातीच्या बहाराला फटका बसला, असे शेतकऱ्यांचे म्हणणे आहे. खानदेशात ९५ टक्के पपईची शिवार खरेदी केली जाते. शिवार खरेदी दिल्ली, राजस्थान, मध्य प्रदेश व धुळे, जळगाव भागातील व्यापारी करतात.