शेतकरी बोंड अळीच्या मदतीपासून वंचित

नागपूर : बोंड अळीग्रस्तांना शासनाकडून सुमारे वर्षभरापैकी मदत जाहीर करण्यात आली. मात्र, नागपूर आणि वर्धा जिल्ह्यांतील हजारो शेतकरी मदतीच्या प्रतीक्षेत आहेत. नागपूर हा मुख्यमंत्र्यांचा गृहजिल्हा आहे, तर राज्याचे अर्थमंत्री सुधीर मुनगंटीवार हे वर्धा जिल्ह्याचे पालकमंत्री आहेत, तरही शेतकरी मदतीपासून वंचित आहेत, हे विशेष. 

मागील वर्षी खरीप हंगामात कापसावर बोंड अळीचा प्रादुर्भाव झाला होता. यामुळे शेतकऱ्यांचे मोठे नुकसान झाले. शासनाने बोंड अळीग्रस्तांना तीन प्रकारे मदत देण्याचे जाहीर केले होते. यात केंद्राच्या मदतीसोबत बियाणे कंपनी आणि पीक विम्याच्या मदतीचा समावेश होता. पीकविम्याचा फायदा मोजक्‍याच शेतकऱ्यांना झाला, तर बियाणे कंपन्यांनी अद्याप शेतकऱ्यांना मदती दिली नाही. फेब्रुवारी महिन्यात मदतीचा आदेश काढला. प्रत्यक्ष मदतीची रक्कम मार्च, एप्रिलमध्ये मिळाली.

नागपूर जिल्ह्यात १ लाख १० हजारांच्या जवळपास शेतकऱ्यांचे बोंड अळीमुळे नुकसान झाले. पहिल्या टप्प्यात नागपूर जिल्ह्याला २२ कोटींचा निधी देण्यात आला. मदतीसाठी शासनाने शासकीय प्रकल्पाचे निकष लावले. पहिल्या टप्प्यातील निधी वितरणाचे प्रमाणपत्र जिल्हाधिकारी कार्यालयाकडून मिळाल्यावर दुसऱ्या टप्प्यातील निधी देण्याचा निर्णयाचा त्यामध्ये समावेश होता. पावसाळी अधिवेशनादरम्यान शासनाने मदतीचा दुसऱ्या टप्प्यातील निधी दिला. याला आज अडीच महिन्यांपेक्षा जास्त काळ झाला. दुसऱ्या टप्प्यातील निधी वितरणाची माहिती सादर केल्यावर अद्याप नागपूर आणि वर्धा जिल्ह्याला तिसऱ्या टप्प्यातील मदत निधी देण्यात आला नाही. त्यामुळे हजारो शेतकरी मदतीच्या प्रतीक्षेत आहेत.

नागपूर जिल्ह्याची ७० कोटींची मागणी असून, दोन टप्प्यांत ५४ कोटी रुपये देण्यात आले. जिल्ह्याचा १६ कोटींचा, तर वर्धा जिल्ह्याचा सव्वा कोटीचा निधी शिल्लक आहे. नागपूर जिल्ह्याकडून दोनदा पत्रव्यवहार करूनीही ही रक्कम देण्यात आली नाही.