पोल्ट्री व्यावसायिकांनी मोफत वाटल्या कोंबड्या-अंडी

अमरावती ः कोरोना व्हायरसला मांसाहार कारणीभूत असल्याची अफवा पसरविण्यात आली. त्याचा फटका अमरावतीमधील पोल्ट्री व्यवसायाला बसला असून रोज दोन कोटी रुपयांचे नुकसान सोसावे लागत आहे. त्याची दखल घेत शासनाकडून मदत मिळावी, अशी मागणी करीत मोफत कोंबड्या आणि अंडी वाटप आंदोलन करण्यात आले. जिल्हाधिकारी कार्यालयासमोर मंगळवारी (ता. १७) करण्यात आलेल्या या आंदोलनाचे नेतृत्व माजी कृषिमंत्री डॉ. अनिल बोंडे यांनी केले होते.  विदर्भात पोल्ट्री व्यवसायाचे हब म्हणून अमरावतीची ओळख आहे. मोठ्या प्रमाणावर अंडी आणि ब्रॉयलर पक्ष्याचे उत्पादन येथे होते. सद्यःस्थितीत मात्र कोरोना प्रादुर्भावाला मांसाहार कारणीभूत असल्याची अफवा पसरविण्यात आल्याने जिल्ह्यातील पोल्ट्री व्यवसाय पूर्णपणे ठप्प झाला आहे. दररोज सुमारे दोन कोटी रुपयांचे नुकसान व्यावसायिकांना सोसावे लागत आहे. त्याची दखल घेत केरळच्या धर्तीवर १०० रुपये प्रति पक्षी तसेच अंड्याला पाच रुपयांप्रमाणे अनुदान, ग्रामपंचायतीद्वारे आकारण्यात येणारा मालमत्ता कर रद्द करावा, वीजबिलातून सूट मिळावी, कर्जाचे पुनर्गठण करण्यात यावे, अशा मागण्या पोल्ट्री व्यावसायिकांनी केल्या आहेत.  त्यासोबतच ज्या कोंबड्यांची विक्री होत नाही त्या नष्ट करण्यासाठी शासनस्तरावरून उपाययोजना करण्यात याव्या, अशीही त्यांची मागणी आहे. या मागण्यांचे निवेदन जिल्हाधिकारी शैलेश नवाल यांना देण्यात आले. या वेळी डॉ. अनिल बोंडे यांच्यासह पोल्ट्री व्यावसायिक रवींद्र मेटकर, अतुल पिरसपूरे, डॉ. शरद भारसाकळे, सुरेश ठाकूर व पोल्ट्री व्यावसायिक उपस्थित होते. कोंबड्या दिल्या फुकट पोल्ट्री व्यावसायिकांनी या वेळी जिल्हाधिकारी कार्यालयासमोर मोफत कोंबड्या व अंडी वाटप केले. या अभिनव आंदोलनाची परिसरात चांगलीच चर्चा रंगली होती.