नगर जिल्ह्यात हमीभाव खरेदी केंद्राकडे शेतकऱ्यांची पाठ

नगर : हमीभावाने मूग, सोयाबीन, उडदाची खरेदी करण्यासाठी नगर जिल्ह्यात अकरा ठिकाणी हमी केंद्रे सुरू केली खरी, मात्र या केंद्राकडे यंदा शेतकऱ्यांनी सपशेल पाठ फिरवली. नगर जिल्ह्यात सुरू करण्यात आलेल्या अकरा केंद्रापैकी चार केंद्र वगळता उर्वरित सात केंद्रावर शेतकऱ्यांनी मका विक्रीसाठी नोंदणीच केला नाही. मूग, सोयाबीन, उडदाच्या विक्रीबाबतही यंदा केंद्राकडे शेतकऱ्यांनी पाठ फिरवली आहे.  नगर जिल्ह्यात मक्याची हमी दराने खरेदी करण्यासाठी  कर्जत, मिरजगाव, खर्डा, नान्नज, नगर, संगमनेर, श्रीरामपूर, श्रीगोंदा, कोपरगाव, राहाता, राहुरी या ठिकाणी मकाचे खरेदी केंद्रे सुरू केली. केंद्रे सुरू होऊन आणि विक्रीसाठी नोंदणीला सुरुवात करून महिन्याचा कालावधी लोटला असला तरी अजूनही नोंदणीला सुरुवात झाली नाही. आतापर्यत कर्जतला १७५, मिरजगावला ७११, नान्नजला ८८ व श्रीरामपूरला ३ शेतकऱ्यांनी नोंदणी केली असून, मिरजगावला २३९७ क्विंटल खरेदी झाली आहे.  नगर यंदा मुगाचे साठ हजार हेक्टर, उडदाचे ४८ हजार हेक्टरवर, सोयाबीनचे १ लाखापेक्षा अधिक हेक्टरवर उत्पादन घेतले. मात्र बाजारात कमी दर मिळत असल्याने नगर जिल्ह्यात टाकळी खांडेश्वरी (ता. कर्जत), जामखेड, खर्डा, नगर, राहुरी, कर्जत, पारनेर, पाथर्डी, संगमनेर, शेवगाव, श्रीगोंदा या ठिकाणी अकरा हमीभाव खरेदी केंद्रे सुरू केली. मात्र, सोयाबीन, मूग, उडीद विक्रीकडेही शेतकऱ्यांनी पाठ फिरवली. आतापर्यंत मुगासाठी ६८७ शेतकऱ्यांनी नोंदणी केली. त्यात ३०९ शेतकऱ्यांनी १६१७ क्विटंल, उडदाची १६ शेतकऱ्यांकडून ११२ क्विंटल खरेदी झाली. सोयाबीनसाठी १३१ शेतकऱ्यांनी नोंदणी केली. मात्र, खरेदी झालीच नाही. सोयाबीन, मूग, उडदाच्या नोंदणीला प्रतिसाद मिळत नसताना बाजारात मात्र मूग, उडदाची मोठी आवक होत आहे आणि दरही हमीदराच्या बरोबरीने आहे.  तुरीचे नियोजन करावे  नगरसह राज्यातच यंदा तुरीचे पीक जोमात आहे. दोन वर्षांपूर्वी तुरीचे उत्पादन अधिक असल्याने विक्रीचा प्रश्‍न निर्माण झाला होता. यंदाची स्थिती पाहता तशी परिस्थिती निर्माण होऊ शकते. त्यामुळे यंदाचे लागवड क्षेत्र आणि होणारे उत्पादन याचा अंदाज बांधून शासनाने हमीभावाने तुरीची खरेदी करण्याचे नियोजन करावे, अशी मागणी होऊ लागली आहे.