शेतजमीन मोजणीचा गोंधळ सुरूच

पुणे : ड्रोनच्या माध्यमातून गावांचे डिजिटल नकाशे तयार करून गावकऱ्याला जमीन मालमत्तेची सनद देण्याची घोषणा शासनाने केली आहे. मात्र, दुसऱ्या बाजूला शेतजमीन मोजणी बिनचूक व वेळेवर होत नसल्याची तक्रार शेतकरी करीत आहेत.  शेतजमीन मोजणीतील शेतकऱ्यांची दुरवस्था दाखविणारे उदाहरण बीडच्या अंबाजोगाई भागातील राडी गावाचे दिले जाते. येथील शेतकरी मधुकर राजाराम पांडे यांना भूमी अभिलेख खात्याने चांगलेच जेरीस आणले आहे.  “माझ्या शेतजमिनीची मोजणी करण्यासाठी शुल्क भरूनही भूमी अभिलेख खात्याने छळ मांडला आहे. तीन वेळा मोजणीसाठी शुल्क भरले. मात्र, प्रत्येक वेळी मोजणी बिनचूक केली गेली नाही. जमिनीच्या मूळ अभिलेखामध्ये छेडछाड केली गेली. वेगवेगळ्या मोजमापाचे नकाशे दिले गेले. भूमी अभिलेख विभागाचे कर्मचारी शेतकऱ्यांची दिशाभूल कशी होते याचा अनुभव मी घेत आहे,” असे श्री. पांडे यांनी सांगितले. या शेतकऱ्याच्या जमीन कागदपत्रांची केवळ हेराफेरी करून भूमी अभिलेख खाते थांबले नाही. मोजणीनंतर चक्क तीन एकर जमीन गायब झाल्याने शेतकऱ्याला धक्का बसला. त्याने पुण्याच्या जमाबंदी आयुक्त व भूमी अभिलेख संचालकांपर्यंत प्रकरण  नेले आहे. अर्थात, शेतकऱ्याला अजून न्याय मिळालेला नाही.  “भूमी अभिलेख खात्याच्या चुकांमुळे माझी तीन एकर जमीन कमी भरली आहे. न्याय मागण्याचा प्रयत्न केला असता संशयास्पदपणे टाळाटाळ केली जाते. त्यामुळे येत्या २६ ऑगस्टला बीड जिल्हाधिकारी कार्यालयात आत्मदहन करण्याचा निर्णय मी घेतला आहे,’’ असे श्री. पांडे यांनी हताशपणे म्हटले आहे. मात्र, भूमी अभिलेख विभागाने शेतकऱ्याच्या मुद्यांना चुकीचे ठरविले आहे. या प्रकरणात संबंधित शेतकऱ्याने फाळणी अभिलेखाविरुद्ध हरकत घेतली आहे. त्यामुळे भूमी अभिलेख विभागाकडे रीतसर अपील दाखल करून मूळ फाळणी नकाशा दुरुस्त करण्याचा पर्याय आहे, असे खात्याचे म्हणणे आहे.   मोजणीप्रक्रिया नियमानुसारच  : जाधव  बीडचे भूमी अभिलेख जिल्हा अधीक्षक सुदाम जाधव यांनी जमीन मोजणीत चुका झाल्याचा दावा फेटाळून लावला आहे. या प्रकरणात मोजणीची कार्यवाही नियमानुसारच पूर्ण झालेली आहे. मात्र, शेतकऱ्याकडून वारंवार अर्ज किंवा उपोषणासारख्या आतताई मार्गाचा अवलंब केला जात आहे. प्रशासनाला असे वेठीस धरल्यास पुढील जबाबदारी शेतकऱ्याचीच राहील, असा इशारा भूमी अभिलेख खात्याने दिलेला आहे.