हरभरा चुकाऱ्यासाठी शेतकऱ्यांचा पोलिस कारवाईचा इशारा

बुलडाणा : गेल्या वर्षात हमीभावाने विक्री केलेल्या हरभऱ्याचे पैसे अद्याप न मिळाल्याने जिल्ह्यातील वरुडी येथील दोन शेतकऱ्यांनी पोलिसांत तक्रार देण्याच्या इशारा मार्केटिंग फेडरेशनच्या अधिकाऱ्यांना दिला अाहे. जनार्दन गारोळे व ज्ञानदेव गारोळे अशी या शेतकऱ्यांची नावे अाहेत.  श्री. गारोळे यांनी दिलेल्या निवेदनात म्हटले, की वरुडी (ता. सिंदखेडराजा) येथील रहिवाशी असून, शेतीवर संपूर्ण उदरनिर्वाह अवलंबून आहे. शासनाने शेतकऱ्यांना हमीभाव देण्यासाठी सुरू केलेल्या नाफेडच्या सिंदखेडराजा येथील खरेदी-विक्री संघातील खरेदी केंद्रामार्फत १३ जून २०१८ रोजी हरभरा विकला. यामध्ये जनार्दन नामदेव गारोळे यांचा १९ क्विंटल व ज्ञानदेव नामदेव गारोळे यांच्या नावे ११ क्विंटल हरभरा विकण्यात अाला. मात्र त्याचे पैसे अद्यापही मिळाले नाहीत. अनेक वेळा उपनिबंधक, तहसीलदारांकडे विनंती अर्ज केले. परंतु प्रतिसाद मिळाला नाही. अजूनही खात्यात पैसे जमा झालेले नाहीत. नाफेडने फसवणूक केली आहे. त्यामुळे नाफेडला विकलेल्या हरभऱ्याचे पैसे बँक खात्यात जमा न केल्यास साखरखेर्डा पोलिस ठाण्यात फसवणुकीबाबतची तक्रार दाखल करू.     सिंदखेडराजा खरेदी-विक्री केंद्र मागील हंगामापासून गाजत अाहे. तूर-हरभरा खरेदी करताना वजनात तफावत, काहींचा माल दुसऱ्याच्या नावे असाही प्रकार झाल्याचे शेतकरी बोलतात. याबाबत अनेक शेतकऱ्यांनी तक्रारी दाखल केल्यानंतर जिल्हा पातळीवरुन चौकशी झाली होती. या खरेदीत प्रथमदर्शनी घोटाळा झाल्याचे लक्षात आल्यावर संबंधित चौकशी अधिकाऱ्यांनी संबंधितांविरुद्ध सिंदखेडराजा पोलिसात गुन्हा सुद्धा दाखल केला. तूर, हरभरा खरेदी अनियमितेत गुन्हे दाखल झाले. परंतु अनेक शेतकऱ्यांचे पैसे अडकले अाहेत. शेतकऱ्यांचे पैसे तातडीने दिले जावे, अशी मागणी या शेतकऱ्यांनी केली अाहे.