फूल उत्पादक शेतकऱ्यांची दिवाळीवर भिस्त

पुणे ः फूल उत्पादक शेतकऱ्यांची प्रमुख भिस्त असणाऱ्या वर्षभरातील महत्त्वाच्या गणेशोत्सव, दसरा आणि दिवाळी या तीन सणांपैकी दिवाळीच्या पार्श्वभूमीवर चांगले दर मिळण्याची आशा आहे. यंदा परतीच्या पावसाने केलेली निराशा आणि दुष्काळी परिस्थितीमुळे फुलांना चांगले दर मिळण्याची शक्यता आहे. पुणे बाजार समितीमध्ये दिवाळीसाठी शनिवार (ता. ३) पासून राज्याच्या विविध भागातून व्यापाऱ्यांकडून खरेदीला सुरवात होऊन आवकेबरोबरच दर वाढण्याची शक्यता वर्तविण्‍यात येत आहे. दिवाळीसाठी झेंडूचे दर १०० तर शेवंतीचे दर १५० रुपयांपर्यंत जाण्याचा अंदाज शेतकरी आणि फूल व्यापाऱ्यांनी व्यक्त केला आहे.

याबाबत बोलताना शेवंती उत्पादक शेतकरी बी. टी. बांगर (रा. मंचर, ता. आंबेगाव) म्हणाले, ‘मी गणेशोत्सव, दसरा आणि दिवाळीचे नियोजन करून पाच एकर शेवंतीची ठिबक सिंचन आणि मल्चिंग पेपरवर लागवड केली. शेवंतीचा हंगाम शेवटच्या टप्प्यात आला असून, दिवाळीसाठी नियोजन केले आहे. यासाठी दहा दिवसांपूर्वी २५० क्रेट फुले शीतगृहात ठेवली आहे.

आज (शुक्रवार, ता. २) पुणे बाजार समितीमध्ये ६० ते ७० रुपये दर मिळाला. उद्यापासून व्यापाऱ्यांकडून खरेदी सुरू होईल. लक्ष्मीपूजन आणि पाडव्याला चांगले दर मिळतील, अशी आशा आहे. या दोन दिवसांसाठी रविवार, सोमवारी खरेदी वाढेल. यावेळी १५० रुपयांपर्यंत दर मिळतील, अशी आशा आहे. गणपती, दसऱ्याला याच दरम्यान दर मिळाले होते. दुष्काळामुळे जर आवक कमी झाली तर शेवंतीचे दर २०० रुपयांपर्यंतदेखील जाण्याची शक्यता आहे.’

दिवाळीसाठी अर्धा एकर झेंडूची लागवड केली असून, सोमवार, मंगळवारी तोडणी करणार आहे. या दोन दिवसांत ८०० किलो फुले निघतील, असा अंदाज आहे. तर दर ५० ते ८० रुपये मिळतील, असे दीपक तरटे (रा. बावधन, ता. वाई) येथील शेतकऱ्यांनी सांगितले. तर पाणी कमीच असून, आताचे पीक निघेल. मात्र, पुढे पाण्याची टंचाई निर्माण होईल. पुढील पिके घेता येतील की नाही माहिती नाही, असेही तरटे म्हणाले.