नगरः कोरोना संसर्गाच्या पार्श्वभूमीवर नगर जिल्ह्यात महिनाभरापासून कापूस खरेदी बंद आहे. त्यामुळे शेतकऱ्यांच्या घरात सुमारे पाच लाख क्विंटलपेक्षा अधिक कापूस शेतकऱ्यांच्या घरात पडून आहे. कापूस विक्री करायला उशीर होत असल्याने दर्जा घसरत असून वजनातही घट होत आहे. यंदा उत्पादनात घट झाली अन् त्यात विक्रीची अडचण येत असल्याने कापूस उत्पादक शेतकरी हवालदिल झाले आहेत. नगर यंदा जिल्ह्यात 1 लाख 25 हजार 663 हेक्टर क्षेत्रावर लागवड झाली होती. त्यातील शेवगाव तालुक्यात 42 हजार, पाथर्डी तालुक्यात 32 हजार, नेवासा तालुक्यात वीस हजार तर कर्जत तालुक्यात आठ हजार हेक्टर क्षेत्रावर लागवड झाली होती. सुरुवातीला कमी पाऊस आणि दिवाळीच्या काळात जोरदार पावसामुळे कापसाचे नुकसान झाले. कृषी विभागाकडे उपलब्ध झालेल्या माहितीनुसार नगर जिल्ह्यात एकरी तीन क्विंटल कापसाचे उत्पादन निघाले आहे. यंदा कापूस खरेदीसाठी राज्य शासनाच्या कापूस पणन महासंघाने शेवगाव तालुक्यातील चापडगाव व कर्जत तालुक्यातील मिरजगाव येथे कापूस खरेदी केंद्र सुरु केले. दोन्ही केंद्रावर आत्तापर्यंत जवळपास दीड लाख क्विंटल कापसाची खरेदी झाली. या भागातून व्यापारीच बहुतांश कापसाची दरवर्षी खरेदी करतात. यंदा मात्र जागतिक स्तरावर कापसाची मागणी नाही. निर्यात धोरण निश्चित नसल्याने गुजरात, उत्तरप्रदेश, राजस्थानात मागणी नसल्याने व्यापाऱ्यांनी फारसी कापसाची खरेदी केलेली नाही. यंदा आत्तापर्यंत अवघा साधारण दीड लाख क्विंटल कापसाची व्यापाऱ्यांकडून खरेदी झाली असल्याचा अंदाज आहे. कोरोना संसर्गाच्या पार्श्वभूमीवर गेल्या महिनाभरापासून कापूस खरेदी केंद्रे बंद आहेत. कधी सुरु होणार हे निश्चित नसल्याने शेतकऱ्यांना कापूस विक्रीची मोठी चिंता सतावत आहे. आजमितीला सुमारे पाच लाख क्विंटलपेक्षा अधिक कापूस घरात पडून असल्याचा अंदाज व्यक्त केला जात आहे. कापूस खरेदी लवकर सुरू केली तरच प्रश्न सुटतील असे दुले चांदगाव (ता. पाथर्डी) येथील कापूस उत्पादक शेतकरी संतोष ढोले यांनी सांगितले. कापूसविषयक स्थिती
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.