कांदा साठवणीसाठी शेतकऱ्यांची धावपळ 

नगर ः नगर जिल्ह्यामध्ये चार दिवसांपासून अवकाळी पाऊस पडत असल्याने कांदा उत्पादक शेतकरी अडचणी सापडला आहे. पावसाच्या नुकसानीपासून वाचण्यासाठी शेतकऱ्यांची कांदा साठवण करण्यासाठी धडपड सुरू आहे. कांदा चाळीत खराब होऊ नये यासाठी लागणारी औषधे मिळत नाही. त्यामुळे शेतकरी त्रस्त झाले आहेत. 

कांद्याला मागील सहा महिन्यांत कमालीचा दर मिळाला. त्यामुळे यंदा नगर जिल्ह्यामध्ये दरवर्षीच्या तुलनेत दुप्पट म्हणजे तब्बल एक लाख चाळीस हजार क्विंटल क्षेत्रावर कांद्याची लागवड झाली. सध्या बऱ्याच भागात काढणी सुरू आहे. काही ठिकाणी कांद्याची काढणी झालेली आहे. मात्र, चार दिवसांपासून अवकाळी पाऊस सुरू असल्याने शेतकऱ्यांची कांद्याचे नुकसान टाळण्यासाठी धावपळ सुरू आहे. 

कांदा काढणीनंतर चाळीत तो दिर्घकाळ टिकावा यासाठी गंधक, कोसावीट व अन्य औषधाचा वापर करतात. सध्या मात्र खते, बियाणे विक्रीची दुकाने बंद आहेत. जी उघडी आहेत तेथेही औषधे मिळत नसल्याने चाळीत भरलेल्या कांद्याचे नुकसान तर होणार नाही ना याची भीती व्यक्त केली जात आहे.