मेळघाटातील शेतकऱ्यांना जाणून घ्यायचेय शेतीपद्धत, तंत्रज्ञान

औरंगाबाद : मेळघाटातील शेतकरी मराठवाडा आणि खानदेशात आली. तीन दिवस इकडच्या शेतीचा अभ्यास करताना त्यांनी शेतीची नवपद्धत अन् त्यामधील तंत्रज्ञान समजून घेण्याची इच्छा असल्याचे ‘ॲग्रोवन’शी बोलताना व्यक्त केली. 

पुण्याच्या मैत्री संस्थेच्या पुढाकारातून मेळघाटातील ४५ शेतकऱ्यांना मराठवाडा आणि खानदेशातील शेती पाहण्याची संधी मिळाली. शनिवारी (ता. २१) औरंगाबाद जिल्ह्यातील फूलंब्री तालुक्‍यातर्गत बाबरा शिवारातील त्यांच्या भ्रमंतीदरम्यान त्यांच्याशी संवादाचा योग आला. 

मेळघाटातील डोमी, भूतरूम, सिमोरी, हातरू आदी गावातील गंगाराम भूसुम, अब्‌बु बेठेकर, अशोक डिक्‍कर, दिलीप भूसूम, हिराजी कासदेकर, मन्नु हिराजी धिक्‍कार, सखाराम भूसुम, आदी मेळघाटातील शेतकऱ्यांनी भूमिका विषद केली. औरंगाबाद, जिल्ह्यातील फेरण जळगाव, देवगाव, बाबरा, बाभूळगाव, तिडका, आदी ठिकाणी पिकपद्‌धती, पुरक उद्योग व तंत्रज्ञानाची माहिती शेतकरी सिकंदर जाधव, शहादेव ढाकणे, कचरू मैंद, संतोष आग्रे, ईश्वर सपकाळ यांनी मेळघाटातील शेतकऱ्यांनी माहिती दिली. 

यावेळी जय जवान जय किसान मंडळाचे दीपक जोशी, मैत्रीचे श्रीराम रामदासी, रामेश्वर फड यांची उपस्थिती होती. औरंगाबादनंतर जळगाव येथील जैन इरिगेशनच्या शेतीविषयक तंत्रज्ञानाची माहिती जाणून घेतल्यानंतर शेतकरी परतीच्या प्रवासाकडे रवाना होणार आहेत.