थकीत रकमेसाठी शेतकऱ्यांचे ‘लपून बसा` आंदोलन

चोपडा, जि. जळगाव : चोपडा साखर कारखान्याकडे असलेल्या थकीत रकमेसाठी शेतकऱ्यांनी मंगळवारी (ता.७) पोलिस ठाण्यात ‘लपून बसा` आंदोलन केले. पैसे न मिळाल्यास स्वातंत्र्यदिनी सामूहिक आत्मदहनाचाही इशारा त्यांनी दिला.

चोपडा शेतकरी सहकारी साखर कारखान्याकडे २०१७-१८ या गाळप हंगामातील सुमारे चारशे शेतकऱ्यांचे चार कोटी रुपये घेणे आहेत. यासाठी शेतकऱ्यांनी मंगळवारी सकाळी दहाला शासकीय विश्रामगृहात बैठक घेतली. नेत्यांच्या संमतीने शेतकऱ्यांना वेठीस धरण्याचे काम सुरू असल्याचा रोष शेतकऱ्यांनी व्यक्त केला. ‘शेतकरी लपवा'' आंदोलनाचा निर्णय घेऊन शहर पोलिस ठाणे गाठले. आम्हाला लपण्यासाठी कोठडी द्यावी, आमच्याकडे कुणी पैसे मागायला येणार नाही, अशी मागणी त्यांनी केली.

पोलिस उपअधीक्षक विजय चव्हाण आणि पोलिस निरीक्षक किसन  नजनपाटील यांनी मध्यस्थी करून जिल्हाधिकाऱ्यांना पत्र दिले. या वेळी पंचायत समितीचे सभापती आत्माराम म्हाळके, प्रदीप पाटील यांनी आंदोलनस्थळी भेट देऊन पाठिंबा दर्शविला. या वेळी शेतकरी कृती समितीचे एस. बी. पाटील, जगदीश पाटील, मुकुंद पाटील, गजानन पाटील, श्‍याम पाटील, संभाजी ब्रिगेडचे संजीव सोनवणे, प्रमोद बोरसे, भास्कर चौधरी, सुभाष पाटील, प्रकाश पाटील, रवींद्र पाटील, शशिकांत निकम, रणजित निकम, अजित पाटील, अविनाश पाटील, सोपान पाटील आदी उपस्थित होते.

चोसाकाकडे सद्यःस्थितीत ७२ लाख रुपये जमा आहेत. उपलब्ध होतील तसे पैसे वाटप केले जाणार आहेत, अशी माहिती कारखान्याचे अध्यक्ष अतुल ठाकरे यांनी दिली. कृती समितीचे सदस्य एस. बी. पाटील यांना नुकतेच दहा टन ३६३ किलोग्रॅम उसाचे पेमेंट अदा केले आहे. चोसाकाकडे १ कोटी ८२ लाख रुपये जमा झालेच नाहीत, असेही ते म्हणाले.