नांदेड, परभणी, हिंगोलीत ३४८.५४ टन रेशीम कोश उत्पादन

नांदेड : नांदेड, परभणी, हिंगोली जिल्ह्यात २०१९-२० मध्ये १ हजार ६७० शेतकऱ्यांनी १ हजार ८०१ एकरवरील तुतीवर ५ लाख ५ हजार ९५० अंडीपुंजापासून ३४८.५४ टन रेशीम कोश उत्पादन घेतले, अशी माहिती जिल्हा रेशीम विकास अधिकारी कार्यालयातील सूत्रांनी दिली. 

गतवर्षीच्या दुष्काळात तीन जिल्ह्यातील अनेक शेतकऱ्यांनी सिंचनासाठी पाणी नसल्यामुळे वाळून गेलेली तुती मोडून टाकली होती. तुतीचे क्षेत्र कमी झाल्यामुळे २०१८-१९ च्या तुलनेत २०१९-२० मध्ये रेशीम कोश उत्पादनात घट झाली. लॉकडाउनमुळे वाहतूक आणि मार्केट बंद राहिले. यामुळेही मोठा तोटा सहन करावा लागला. 

नांदेड जिल्ह्यात २०१८-१९ मध्ये ६८६ शेतकऱ्यांनी ८३३ एकरवरील तुतीवर २ लाख ६४ हजार १७२ अंडीपुंजापासून १५७.०२४ टन, २०१९-२० मध्ये ४६३ शेतकऱ्यांनी ५७५ एकरवरील तुतीवर १ लाख ७८ हजार ४५० अंडीपुंजापासून १०६.५४ टन कोश उत्पादन घेतले, असे रेशीम विकास अधिकारी पी. बी. नरवाडे यांनी सांगितले. 

परभणी जिल्ह्यात २०१८-१९ मध्ये ८५६ शेतकऱ्यांनी ९४० एकरवरील तुतीवर ४ लाख ३५ हजार अंडीपुंजापासून २५२.७७० टन कोश उत्पादन घेतले होते.सन २०१९ मध्ये ८१८ शेतकऱ्यांनी ८१४ एकरवरील तुतीवर ३ लाख १४ हजार अंडीपुंजापासून १६७ टन कोश उत्पादन घेतले असे रेशीम अधिकारी पी.एस.देशपांडे यांनी सांगितले. 

हिंगोली जिल्ह्यात २०१८-१९ मध्ये ५२१ शेतकऱ्यांनी ५५९.६५ एकवरील तुतीवर २ लाख १० हजार ७०९ अंडीपुंजापासून १०६.००९ टन, तर २०१९-२० मध्ये ३८९ शेतकऱ्यांनी ४१२ एकरवरील तुतीवर १ लाख ३५ हजार अंडीपुंजापासून ७५ टन रेशीम कोश उत्पादन घेतले. जिल्ह्यतील १०० शेतकऱ्यांना रेशीम कोश विक्रीतून २ लाख रुपयावर उत्पन्न मिळाले. उर्वरित शेतकऱ्यांना ५० ते ८० हजार रुपयांचे उत्पन्न मिळाले, असे रेशीम विकास अधिकारी स्वप्नील तायडे, अशोक वडवळे यांनी सांगितले. 

जिल्हानिहाय शेतकरी, तुती लागवड (एकरमध्ये), कोश उत्पादन (टनमध्ये )