निफाड तालुक्यातील शेतकरी रब्बीच्या विम्यापासून वंचित

नाशिक : निफाड तालुक्यातील चांदोरी मंडळातील शेतकऱ्यांनी रब्बी २०१९-२० च्या हंगामात गहू, कांदा व द्राक्ष पिकांसाठी पंतप्रधान पीक विमा योजनेत सहभाग नोंदवला. मात्र, मार्चमध्ये झालेल्या वादळी वाऱ्यासह पावसाने येथील पिके आडवी झाली. शासन स्तरावरून पंचनामे होऊन अहवाल कंपनीला पाठविण्यात आले. मात्र, त्याचा परतावा अद्याप न मिळाल्याने शेतकरी अडचणीत सापडले आहेत.

तालुक्यातील चांदोरी महसूल मंडळातील चितेगाव, नारायणगाव, चेहडी खुर्द या तीन गावातील ३६ शेतकऱ्यांनी गहू व कांदा पिकासाठी, तर ५ शेतकऱ्यांनी द्राक्ष बागांचा विमा उतरविला होता. त्यापोटी अग्रीकल्चर इन्शुरन्स कंपनीने भरपाई कमी दिल्याचे शेतकरी सांगत आहेत. तर, फ्युचर जनरल इंडिया इन्शुरन्स कंपनीच्या माध्यमातून अद्याप विम्याची रक्कम भेटलेली नाही. त्याबाबत उत्तर कुठलीही यंत्रणा देत नसल्याची स्थिती आहे.  

नुकसान झाल्यानंतर टाळेबंदी असताना संबंधित कंपन्यांना कळविण्यात आले. काढणीवेळी कोरोनाच्या वातावरणात टाळेबंदी असताना कंपनीकडे पाठपुरावा करूनही विमा प्रतिनिधींनी पीक पाहणी केली नाही. अखेर शासन स्तरावरून नुकसानीचा अहवाल संबंधित कंपन्यांना पाठविण्यात आला. मात्र कंपनी शेतकऱ्यांना भरपाई देण्यासाठी प्रतिसाद देत नसल्याचा आरोप शेतकऱ्यांनी केला. 

पंचनामे केल्यानंतर संबंधित कंपनीला पत्र पाठवून पाठपुरावा केला नाही. याबाबत कंपनीने भरपाई देण्याबाबत निर्णय घेतलेला नाही. त्यामुळे पाठपुरावा सुरू आहे. - बी. जी. पाटील, तालुका कृषी अधिकारी, निफाड.

अवकळी पावसाने नुकसान झाले. त्यात टाळेबंदीमुळे बाजार भाव कमी झाले. विमा कंपनीने भरपाई कमी दिली आहे. त्यामुळे लाभ हवा तसा मिळाला नाही. - विठ्ठल पिंगळे, द्राक्ष बागायतदार, चितेगाव, ता. निफाड

अवकाळी पाऊस मार्च महिन्यात झाला. त्याच वेळी टाळे बंदीच्या काळात विमा कंपनी प्रतिनिधी प्रतिसाद देत नव्हते. मात्र, शासनाने पंचनामे करूनही अद्याप भरपाई मिळाली नाही. ती तातडीने द्यावी. - सचिन भोज, गहू उत्पादक शेतकरी, चितेगाव, ता. निफाड.