शेतकऱ्यांनो पीक कर्जासाठी ऑनलाइन मागणी करा ः जिल्हाधिकारी चौधरी

औरंगाबाद : ‘‘कोरोनाच्या पार्श्‍वभूमीवर होणाऱ्या गर्दीचे नियमन करण्यासाठी जिल्हयातील पीक कर्जासाठी इच्छुक शेतकऱ्यांनी http://KCC.setuonline.com/ या संकेतस्थळावरील ऑनलाईन अर्ज भरुन पीक कर्जाची मागणी नोंदवावी’’, असे आवाहन जिल्हाधिकारी उदय चौधरी यांनी केले. 

चौधरी म्हणाले, ‘‘ही लिंक aurangabad.nic.in या संकेत स्थळावर देखील उपलब्ध आहे. खरिपासाठी जिल्हयात बँकातर्फे पीक कर्ज वाटप सुरू आहे. सर्व शेतकऱ्यांना किसान क्रेडिट कार्ड योजनेचा लाभ घेता यावा, ज्या शेतकऱ्यांनी पीएम किसान योजनेचा लाभ घेतला आहे. परंतु, त्यांना किसान क्रेडिट कार्ड योजनेचा लाभ मिळाला नव्हता, अशा सर्व शेतकऱ्यांना या पोर्टलद्वारे या योजनेचा लाभ घेता येईल. या लिंकव्दारे नोंदणी केलेल्या शेतकऱ्यांची यादी जिल्हा अग्रणी बैंक, औरंगाबादतर्फे संबंधित बँकेकडे पाठविण्यात येतील. एका आधारकार्ड धारकास एका बँकेतच पीक कर्ज मागणी करता येईल. 

आपल्या नजीकच्या बँक शाखेची निवड करावी. यादी प्राप्त झाल्यानंतर संबंधित बँक शाखेकडून पात्र शेतकऱ्यांना संदेश पाठविण्यात येतील. संदेश प्राप्तीनंतर शेतकऱ्यांनी बॅंकेने दिलेल्या तारखेस त्यांचे आधारकार्ड , ७/१२ , ८. अ , फेरफार नक्कल , पॅनकार्ड , टोचनकाशा , पासपोर्ट साईज २ फोटो , पास बुक या कागदपत्रासह बैंकेत उपस्थित राहावे. अंतिम पीक कर्ज मंजुरी किंवा नामंजुरी बँकेच्या नियमाप्रमाणे करण्यात येईल. सर्व राष्ट्रीयकृत, ग्रामीण व जिल्हा बँकेच्या सर्व जिल्हा समन्वयकांनी व शाखाधिकाऱ्यांनी नोंदणीकृत शेतकऱ्यांची यादी जिल्हा अग्रणी बँक व्यवस्थापक यांच्याकडून प्राप्त करून घ्यावी, असे आवाहन जिल्हाधिकारी चौधरी यांनी केले. 

इच्छुक शेतकऱ्यांनी पीक कर्ज मागणी नोंदणी करावी. काही अडचण आल्यास आपल्या जवळच्या बँक शाखेशी संपर्क साधावा.