यवतमाळ येथे पीककर्जाविरोधात शेतकरी करणार नागडा पोळा साजरा

यवतमाळ  ः कर्जाचे पुनर्गठण करून नव्याने कर्ज देण्याचे आश्‍वासन निव्वळ पोकळ ठरले आहे. जिल्ह्यात आजही हजारावर शेतकरी पीककर्जापासून वंचित असल्याचा आरोप करीत याविरोधात नागडा पोळा साजरा करण्याचा इशारा शेतकरी वारकरी संघटनेने दिला आहे. निवासी उपजिल्हाधिकाऱ्यांना या संदर्भाने निवेदन देण्यात आले.  सिंचनाच्या सोयीसुविधांअभावी यवतमाळ जिल्ह्यात कोरडवाहू पिके घेतली जातात. निसर्गावर अवलंबून असलेल्या या शेती पद्धतीमध्ये शाश्‍वती काहीच नाही. परिणामी एखाद वर्षी ओल्या तर एखाद्या वर्षी कोरड्या दुष्काळाचा सामना शेतकऱ्यांना करावा लागतो. यातूनच दरवर्षी उत्पादकता प्रभावित होत असल्याने अपेक्षित उत्पन्न मिळत नाही. यामुळे आलेल्या नैराश्‍यातून जिल्ह्यात शेतकऱ्यांच्या आत्महत्यांचे प्रमाणही वाढीस लागले आहे. असे असतानाही बॅंकांकडून आजपर्यंत हजारांवर शेतकऱ्यांना साध्या पीककर्जाचे वाटप करण्यात आले नाही. कर्जाचे पुनर्गठण करून शेतकऱ्यांना नव्याने पीककर्ज देण्याची घोषणा सरकारने केली होती. परंतु त्यांच्या अंमलबजावणीकडे मात्र प्रशासनाने साफ दुर्लक्ष केले. त्याच्या परिणामी शेतकऱ्यांसमोरील अडचणीत वाढ झाली आहे. बॅंकांकडून कर्ज मिळत नसल्याने अनेकांनी खासगी कर्ज घेत पेरणी केली. त्यानंतर निंदण, खते व फवारणीसाठीच्या  खर्चासाठी देखील शेतकऱ्यांवर वणवण भटकंतीची वेळ आली आहे. पीककर्जाविषयी अनेकदा तक्रारी करूनही प्रशासनाकडून त्याची दखल घेण्यात आली नाही. पोळ्यासारखा सण साजरा करण्यासाठी देखील शेतकऱ्यांकडे पैसे नाहीत. याविरोधात जिल्हाधिकारी कार्यालयातच नागडा पोळा साजरा करण्याचा इशारा शेतकरी वारकरी संघटनेचे अध्यक्ष सिकंदर शहा यांनी दिला आहे. उपजिल्हाधिकाऱ्यांची भेट घेत त्यांना या संदर्भाने निवेदन देण्यात आले. या वेळी अनुप चव्हाण, दीपक मडसे, अविनाश रोकडे, कैलास फुफरे यांच्यासह शेतकरी उपस्थित होते.