शेतकरीप्रश्‍न विधिमंडळात मांडणार ः रोहित पवार

नवी मुंबई : शेतकऱ्यांना आणि व्यापाऱ्यांना बाजार समितीमध्ये येणाऱ्या अडचणी येत्या विधिमंडळ अधिवेशनात मांडणार, अशी माहिती राष्ट्रवादी काँग्रेसचे आमदार रोहित पवार यांनी दिली.

रोहित पवार यांनी आज पहाटे अचानकपणे नवी मुंबईतील कृषी उत्पन्न बाजार समितीला भेट देत तेथील शेतकरी, माथाडी कामगार यांच्या समस्या जाणून घेत त्यांच्याशी संवाद साधला.

केंद्र सरकारने कृषी कायदे राज्य सरकारवर लादले आहेत. तरी राज्य सरकार शेतकऱ्यांच्या हिताचा नक्कीच विचार करेल, असे आश्वासन त्यांनी शेतकऱ्यांना दिले. त्याच बरोबर रोहित पवारांनी ठिकठिकाणी थांबून व्यापारी आणि शेतकऱ्यांची विचारपूस केली.  ‘‘आम्ही लोकप्रतिनिधी असतो तेव्हा शेतकरी फोन करत असतात. तीन महिने झाले व्यापाऱ्याकडून पैसे नाही आले, हा व्यापारी दर कमी देत आहे वैगेरे तक्रार करतात. तेव्हा आम्ही त्या एपीएमसी मार्केटच्या प्रमुखांशी बोलून विषय सुटतो का यासाठी प्रयत्न करत असतो, त्यामुळे मार्केट महत्त्वाची आहेत,’’ असे ते म्हणाले. यावेळी प्रसार माध्यमांशी बोलताना पवार म्हणाले, भाजप सक्तवसुली संचालनालयाचा (ईडी) वापर करून विरोधकांना लक्ष्य करत आहे. कदाचित उद्या मलाही ‘ईडी’ची नोटीस येऊ शकते, ईडी मार्फत राजकीय विरोधकांना लक्ष्य केले जात असल्याचा आरोप पवार यांनी केला.  

महानगरपालिकांमध्ये महाविकास आघाडीतील शिवसेना, राष्ट्रवादी आणि काँग्रेस हे तिन्ही पक्ष एकत्र लढू शकतात. पण तशा वाटाघाटी आणि समीकरणे जुळून आली पाहिजेत. पदवीधर आणि विधान परिषद निवडणुकीत एकत्रित ताकद मोठी असल्याचे दिसून आले. त्यामुळे आगामी काळातही भाजपाच्या विचारधारेला रोखण्यासाठी महाविकास आघाडी एकत्रित लढेल. पण शेवटी हा निर्णय तिन्ही पक्षांचे प्रमुख नेते घेतील, असे रोहित पवार यांनी सांगितले.