येवल्यात कांदा लिलाव नोंदणीसाठी शेतकऱ्यांच्या रांगा

येवला, जि. नाशिक ः कृषी उत्पन्न बाजार समितीत शनिवार (ता. १८) पासून कांदा लिलाव सुरू होणार आहे. मात्र, त्यासाठी आदल्या दिवशी बाजार समितीत शेतकऱ्यांना नाव नोंदणी करणे अनिवार्य केले आहे. या नियमामुळे नावनोंदणीसाठी आज (शुक्रवारी) बाजार समितीत शेतकऱ्यांची लांबच लांब रांग लागली होती.

शनिवारी आपला कांदा विक्री व्हावा, यासाठी शेतकरी नाव नोंदणी करण्यासाठी मोठ्या संख्येने जमा झाले होते. शेतकऱ्यांनी मोठ्या प्रमाणात लाल कांदा काढून ठेवला असून लॉकडाऊनचा फटका बसून अनेक बाजार समित्या गेल्या दोन आठवड्यांपासून धरसोड पद्धतीने चालू बंद राहत आहे.

त्यातच मागील व चालू आठवड्यात तर सर्वत्र लिलाव बंद असल्याने शेतकऱ्यांना कांदा खराब होण्याची भीती लागली आहे. दोन दिवसांपासून ढगाळ हवामान असल्याने शेतकरी अजूनच धास्तावले असून कांदा खराब होण्याची व भाव पडण्याची देखील भीती आहे. 

त्यामुळे लिलाव सुरू होण्याचे कळताच शेतकऱ्यांकडून मोठ्या प्रमाणात बाजार समितीत गर्दी होऊन सोशल डिस्टन्सिंगचा फज्जा उडू  शकतो, त्यामुळे काळजी घेत बाजार समितीने शनिवारपासून लिलाव सुरू करण्याचा निर्णय घेत शुक्रवारी नाव नोंदणी करून टोकन घ्यावे, अशा सूचना दोन दिवसांपूर्वी दिल्या होत्या.

त्यामुळे आज सकाळपासूनच बाजार समितीत नाव नोंदणीसाठी शेतकऱ्यांची लांबच लांब रांग लागली. एकेक करत शेतकऱ्यांची नाव नोंदणी दुपारपर्यंत सुरू होती. प्रत्येक लिलावाच्या दिवशी येवल्यात फक्त पाचशे व अंदरसुलला ३०० ट्रॅक्टरची नोंदणी करून लिलाव केले जाणार असल्याची माहिती सभापती उषाताई शिंदे, सचिव कैलास व्यापारे यांनी दिली.