अाॅनलाइन नोंदणी न झाल्यास शेतकरीच जबाबदार !

अकोला ः शासनाच्या आधारभूत किमतीने तूर खरेदीसाठी शेतकऱ्यांना अाॅनलाइन नाव नोंदणीचे निर्देश देण्यात अाले आहेत. ही नावनोंदणी करण्यासाठी जाणाऱ्या शेतकऱ्यांना वाशीम जिल्ह्यातील मालेगाव येथील खरेदी-विक्री संघाच्या केंद्रावर एक वेगळाच अर्ज लिहून द्यावा लागला. येथे शेतकऱ्याच्या अर्जाची अाॅनलाइन नोंदणी न झाल्यास अापण स्वतः जबाबदार राहू, खरेदी-विक्री संघ जबाबदार राहणार नाही, अशा प्रकारचा हा अर्ज लिहून घेण्यात आला अाहे. नाफेडच्या माध्यमातून अाधारभूत किमतीने तूर खरेदीसाठी नावनोंदणीचे आवाहन करण्यात अाले होते. मालेगाव येथे खरेदी-विक्री संघात नावनोंदणी केंद्र अाहे. या ठिकाणी शेतकरी नावनोंदणीसाठी गेले असता त्यांच्याकडून खरेदी-विक्री संघाने विनंती अर्जच लिहून घेण्याचा प्रकार केला. या अर्जात तूर नोंदणीसाठी गेलेल्या शेतकऱ्याची अाॅनलाइन नाव नोंदणी न झाल्यास त्यासाठी तो स्वतः जबाबदार राहील. यासाठी खरेदी विक्री संस्था जबाबदार नसेल असा मजकूर असलेला अर्ज लिहून घेण्यात अाला. ही बाब निदर्शनास अाल्यानंतर स्वाभिमानी शेतकरी संघटनेचे जिल्हाध्यक्ष दामोदर इंगोले यांनी तेथे जात विरोध केला. असा अर्ज लिहून घेणे योग्य नाही हे त्यांनी सांगितले. प्रतिक्रिया हा प्रकार समजताच नावनोंदणी केंद्रावर भेट दिली. या ठिकाणी खरेदी-विक्री संस्थेचे व्यवस्थापक अरुण इंगोले यांच्याशी चर्चा केली. शेतकऱ्यांकडून असा अर्ज घेणे योग्य नाही, तसेच नावनोंदणी करताना शेतकऱ्यांकडून प्रत्येकी १० रुपये घेण्यात येऊ नयेत, शासनाने नोंदणीची मुदत वाढवून द्यावी अशी मागणी केली. - दामोदर इंगोले, जिल्हाध्यक्ष, स्वाभिमानी शेतकरी संघटना, वाशीम