सांगली जिल्ह्यात शेतकऱ्यांना लागली उसाची गोडी

सांगली जिल्ह्यात शेतकऱ्यांना लागली उसाची गोडी
सांगली जिल्ह्यात शेतकऱ्यांना लागली उसाची गोडी

सांगली ः गेल्या तीन वर्षांपूर्वी जिल्ह्यात उसाच्या क्षेत्रात घट झाली होती. यंदाही पाणीटंचाईमुळे उसाच्या क्षेत्रात घट होईल असा अंदाज व्यक्त केला जात होता. परंतु उपलब्ध पाण्यावर शेतकऱ्यांनी उसाची लागवड केली. गेल्या वर्षी ८९ हजार ९१८ हेक्टर उसाचे क्षेत्र होते. यंदा उसाच्या क्षेत्रात सहा हजार हेक्टरने वाढ झाली असून ९५ हजार ८२७ हेक्टर इतके झाले आहे. जिल्ह्यातील साखर कारखान्यांनी गाळप पूर्वतयारी सुरू केली आहे.

यंदा दुष्काळाची दाहकता, आणि पाण्याची कमतरता यामुळे जिल्ह्यात उसाच्या क्षेत्रात घट होण्याची शक्यता होती. परंतु शेतकऱ्यांनी ठिबक सिंचन प्रणाली वापरली आहे. यामुळे ऊस पिकाला पाणी कमी लागू लागले आहे. परिमाणी कमी पाण्यात जास्तीत जास्त उसाचे उत्पादन घेण्यासाठी जणू स्पर्धाच लागली आहे. त्यामुळे पाण्याची उपलब्धता पाहून शेतकऱ्यांनी उसाची लागवड केली आहे. त्यातच एफआरपीचा कायदा कडक करण्यात आला आहे. साखर आयुक्तांनी हा कायदा कडक केल्याने कारखानदारांनी शेतकऱ्यांना पैसेही देऊ केले आहेत. त्यामुळे शेतकऱ्यांना उसाची गोडी लागली आहे.

गतवर्षीच्या तुलनेत वाढ जिल्ह्यात दुष्काळी परिस्थिती असतानाही ऊस क्षेत्रात कमालीची वाढ झाली आहे. गतवर्षीच्या तुलनेत सहा हजार हेक्टरने वाढ झाली आहे. आडसाली आणि खोडवा या हंगामातील उसाच्या क्षेत्रात वाढ झाली असल्याचे कृषी विभागाने सांगितले आहे. मात्र, गेल्या वर्षी सुरू हंगामातील उसाचे क्षेत्र १० हजार १८५ हेक्टर होते. परंतु यंदा या हंगामातील १ हजार ९७७ हेक्टरने कमी होऊन ते ८ हजार २०८ हेक्टर इतके आहे.

कारखान्यांची गाळप तयारी पूर्ण जिल्ह्यात खासगी आणि सहकारी १६ साखर कारखाने आहेत. हे कारखाने यंदाही पूर्ण क्षमतेने सुरू होणार आहेत. त्यासाठी कारखान्यांनी गाळपाची पूर्ण तयारी केली आहे. अनेक कारखान्यांनी तोडणी-वाहतूक करारही पूर्ण केले आहेत. ऊस नोंदणीचेही काम पूर्ण झाले आहे, अशी माहिती कारखान्याच्या सूत्रांनी दिली.

यंदाच्या हंगामात गाळपासाठी सज्ज ऊस क्षेत्र
ऊस क्षेत्र (हेक्टर)
आडसाली ३२ हजार ३२३
पूर्व हंगामी १७ हजार २५१
सुरू ८ हजार २०८
खोडवा ३७ हजार ६४५
एकूण ९५ हजार ८२७
गतवर्षीचे ऊस क्षेत्र
ऊस क्षेत्र हेक्टर
आडसाली २९ हजार १४९
पूर्व हंगामी १७ हजार २८१
सुरू १० हजार १८५
खोडवा ३३ हजार  ३०३
एकूण ८९ हजार ९१८

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com